Turqia dhe Britania nënshkruajnë memorandum mirëkuptimi për bashkëpunimin mbi avionët “Eurofighter Typhoon”

Turqia dhe Britania nënshkruajnë memorandum mirëkuptimi për bashkëpunimin mbi avionët “Eurofighter Typhoon”

“Ky dokument kodifikon marrëdhëniet midis vendeve, duke i çuar ato një hap më afër një marrëveshjeje të plotë për ‘Typhoon'”, tha Ministria e Mbrojtjes Kombëtare e Turqisë

Ministri turk i Mbrojtjes, Yaşar Güler, dhe Sekretari i Mbrojtjes i Mbretërisë së Bashkuar, John Healey, nënshkruan sot një memorandum të plotë mirëkuptimi (MoU) mbi pranimin e Turqisë si operator i avionëve luftarakë “Eurofighter Typhoon”, transmeton Anadolu.

Memorandumi u nënshkrua gjatë Panairit të 17-të Ndërkombëtar të Industrisë së Mbrojtjes (IDEF) në Stamboll, tha Ministria e Mbrojtjes Kombëtare e Turqisë.

“Ministrat e Mbrojtjes kanë nënshkruar sot së bashku një Memorandum Mirëkuptimi. Ky dokument kodifikon marrëdhëniet midis vendeve, duke i çuar ato një hap më afër një marrëveshjeje të plotë për ‘Typhoon’. Të dy ministrat e mirëpresin nënshkrimin si një hap pozitiv drejt sjelljes së Turqisë në klubin ‘Typhoon’ dhe ndajnë një ambicie të ndërsjellë për të përfunduar marrëveshjet e nevojshme sa më shpejt të jetë e mundur”, tha ministria në një deklaratë.

“Ministria e Mbrojtjes i Republikës së Turqisë dhe ai i Mbretërisë së Bashkuar mirëpritën mundësinë për t’u takuar në Panairin e 17-të Ndërkombëtar të Industrisë së Mbrojtjes në Stamboll sot dhe riafirmuan forcën e partneritetit Turqi-Mbretëri e Bashkuar”, theksohet më tej.

“Ata nënvizuan rëndësinë e bashkëpunimit të gjatë të mbrojtjes midis dy vendeve, duke përfshirë bashkëpunimin përmes NATO-s dhe lidhjet në rritje në industrinë e mbrojtjes dhe siguri. Të dy ministrat u zotuan për thellimin e këtij partneriteti strategjik në mbështetje të parandalimit kolektiv të Aleancës”, tha ministria.

“Të dy vendet vazhdojnë të bëjnë përparim të shkëlqyer në eksportin e ‘Eurofighter Typhoon’. Mirëpritja e Turqisë si operator i ‘Typhoon’ do të avancojë lidhjet e miqësisë të zhvilluara gjatë shumë dekadave midis aleatëve kryesorë të NATO-s dhe do të jetë një hap i rëndësishëm drejt përmirësimit të aftësive të përparuara ajrore luftarake të Turqisë”, thuhet në deklaratë.

“Kjo do të shënojë fillimin e një kapitulli të ri në partneritetin Turqi-Mbretëri e Bashkuar, duke punuar së bashku për të forcuar bashkëpunimin në aftësi dhe duke mbështetur industritë e mbrojtjes të të dy vendeve përmes blerjes reciproke të pajisjeve kryesore në botë”, shtoi Ministria turke e Mbrojtjes Kombëtare.

Kategoritë
BotaLajme