– Shumë nga viktimat prisnin ndihmë humanitare në mes të krizës ushqimore për shkak të bllokadës izraelite
Të paktën 45 palestinezë të tjerë janë vrarë dhe dhjetëra të tjerë janë plagosur, ndërsa ushtria izraelite përshkallëzoi sot sulmet e saj në Rripin e Gazës të shkatërruar nga lufta, thanë mjekët, transmeton Anadolu.
Forcat izraelite bombarduan civilët që prisnin shpërndarjen e ndihmave në Korridorin Netzarim dhe Rrugën Salah al-Din në Gazën qendrore, duke vrarë 11 persona dhe duke plagosur mbi 65 të tjerë, tha një burim mjekësor për Anadolu.
Gjashtë persona të tjerë u vranë nga bombardimet izraelite ndaj shtëpive të tyre në qytetin Al-Zawayda në Gazën qendrore.
Mjekët thanë se dy persona të tjerë, përfshirë një grua, u vranë në një sulm ndaj një shkolle të shndërruar në strehë në kampin e refugjatëve Maghazi në Gazën qendrore.
Dymbëdhjetë persona të tjerë u vranë në sulme të ndara ndaj një shtëpie dhe tende që strehonte civilë të zhvendosur në qytetin jugor Khan Younis, thanë mjekët.
Zjarri izraelit vrau gjithashtu gjashtë kërkues të tjerë ndihmash pranë një pike shpërndarjeje në veri të qytetit Rafah në Gazën jugore.
Dy palestinezë vdiqën nga plagët që morën në sulmet e mëparshme izraelite në pjesën qendore dhe atë jugore të Rripit të Gazës, thanë burimet mjekësore.
Një i ri vdiq gjithashtu nga kequshqyerja e rëndë në qytetin jugor Khan Younis mes një rrethimi izraelit ndaj enklavës, tha zyra mediale e qeverisë.
Në Qytetin e Gazës, një sulm izraelit ndaj një grupi civilësh vrau një palestinez në lagjen Al-Zeitoun. Trupat e dy personave të vrarë në sulme të mëparshme izraelite u gjetën gjithashtu në lagjen Al-Tuffah të të njëjtit qytet.
Dy persona të tjerë u vranë nga një sulm me dron izraelit në lagjen Shejaiya të Qytetit të Gazës.
Sipas dëshmitarëve, ushtria izraelite bombardoi ndërtesa banimi në lindje të Qytetit të Gazës dhe në lindje të Khan Younisit.
Ushtria izraelite ka kryer një ofensivë brutale në Rripin e Gazës që nga 7 tetori 2023, duke vrarë deri më tani më shumë se 56.600 palestinezë, shumica prej tyre gra dhe fëmijë.
Gjykata Ndërkombëtare Penale lëshoi urdhëra arresti nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.
