Shumë nga viktimat prisnin ndihmë humanitare në Gazën e rrethuar
Të paktën 10 palestinezë të tjerë u vranë dhe dhjetëra të tjerë u plagosën ndërsa ushtria izraelite përshkallëzoi sulmet e saj në Rripin e Gazës të shkatërruar nga lufta, thanë mjekët, transmeton Anadolu.
Një burim mjekësor për Anadolu tha se tre persona u vranë dhe më shumë se 15 të tjerë u plagosën kur forcat izraelite bombarduan njerëzit që prisnin kamionë ndihmash në Korridorin Netzarim, në jugperëndim të Qytetit të Gazës.
Një palestinez u vra dhe 50 të tjerë u plagosën në një sulm tjetër izraelit ndaj një turme që priste për shpërndarjen e ndihmave në rrugën “Salah al-Din” në Gazën qendrore, tha një burim mjekësor në spitalin “Al-Awda” në kampin e refugjatëve Nuseirat.
Gjashtë persona të tjerë u vranë nga bombardimet izraelite të shtëpive të tyre në qytetin Al-Zawayda në Gazën qendrore. Sipas dëshmitarëve, ushtria izraelite bombardoi ndërtesa banimi në qytetin lindor të Gazës dhe në Khan Younis lindor në jug.
Pavarësisht thirrjeve ndërkombëtare për armëpushim, ushtria izraelite ka vrarë më shumë se 56.500 palestinezë në një sulm vdekjeprurës në Rripin e Gazës që nga tetori i vitit 2023.
Nëntorin e kaluar, Gjykata Ndërkombëtare Penale (GJNP) lëshoi urdhër-arreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë (GJND) për luftën e tij në enklavë.
