Kompania ajrore turke Turkish Airlines ka njoftuar zgjerimin e madh të flotës së saj me blerjen e 225 avionëve nga kompania Boeing, është konfirmuar në një njoftim të publikuar në Bursën e Stambollit të premten.
Kompania do të blejë 75 avionë të gjerë Boeing B787-9 dhe B787-10, ndërsa ka finalizuar bisedimet me Boeing për blerjen e 150 avionëve të ngushtë 737-8/10MAX.
Avionët për fluturime të gjata dhe bashkëpunimi me prodhuesit e motorëve
Turkish Airlines do të porosisë 50 avionë të konfirmuar dhe 25 opsionalë B787-9 dhe B787-10, me dërgesa të planifikuara ndërmjet viteve 2029 dhe 2034. Bëhet fjalë për avionë ekonomikë për linja të gjata, të destinuar për fluturime ndërkombëtare.
Për këta avionë, kompania turke po zhvillon bisedime me Rolls-Royce dhe GE Aerospace lidhur me furnizimin e motorëve, pjesëve rezervë dhe shërbimeve të mirëmbajtjes.
Marrëveshja edhe për modelet 737 MAX
Në një njoftim tjetër, kompania ka konfirmuar përfundimin e negociatave me Boeing për 150 avionë 737-8/10MAX, nga të cilët 100 janë porosi të sigurta dhe 50 opsionale. Vazhdimi i kontratës varet nga përfundimi i bisedimeve me furnizuesin e motorëve CFM International.
Sfondi politik
Ky vendim biznesi vjen vetëm një ditë pas takimit të presidentit turk Recep Tayyip Erdoğan dhe presidentit amerikan Donald Trump në Washington. Trump me atë rast sinjalizoi mundësinë që SHBA të heqë së shpejti ndalimin për shitjen e avionëve luftarakë të avancuar Turqisë, një aleate e NATO-s.
Kujtojmë se gjatë mandatit të parë të Trumpit, Washingtoni në vitin 2019 e përjashtoi Ankaranë nga programi i avionëve luftarakë F-35, pasi Turqia bleu sistemin rus të mbrojtjes ajrore S-400.
Turkish Airlines aktualisht operon një nga rrjetet më të mëdha të fluturimeve në botë dhe me këtë blerje forcon më tej pozicionin e saj global.
