Stuhia Darragh ka mbërritur në Evropë, miliona njerëz janë paralajmëruar të qëndrojnë në shtëpi: “Kjo është shumë serioze.”
Miliona njerëz në disa pjesë të Uellsit dhe në jugperëndim të Anglisë janë këshilluar të qëndrojnë në shtëpi, ndërsa meteorologët paralajmërojnë për rrezik ndaj jetës për shkak të stuhisë Darragh, e cila sjell erëra me shpejtësi deri në 150 km/h.
Met Office ka lëshuar një paralajmërim të kuq, nivelin më të lartë të paralajmërimeve për kushtet atmosferike potencialisht të rrezikshme për jetën. Rreth tre milionë njerëz të premten në mbrëmje kanë marrë një mesazh urgjent nga qeveria në telefonat e tyre celularë me këshilla mbi stuhinë.
Në paralajmërim shtohet që njerëzit duhet të “mendojnë të mbledhin pishtarë, bateri, karikues për telefonat celularë dhe sende të tjera thelbësore që tashmë mund t’i keni në shtëpi,” në rast të ndërprerjes së energjisë elektrike.
Mesazhi i së premtes ishte përdorimi më i madh deri më tani i sistemit britanik të paralajmërimeve.
“Qëndrimi jashtë në erëra të forta ju bën të rrezikuar nga lëndimet. Qëndroni brenda nëse mundeni,” thuhet në paralajmërim.
Banorët në Irlandë janë këshilluar të marrin shumë seriozisht këto paralajmërime të kuqe.
“Paralajmërimi i kuq do të thotë që nuk duhet të udhëtoni gjatë kësaj periudhe, dhe megjithëse është periudha para Krishtlindjeve, ne u bëjmë thirrje njerëzve t’i përmbahen me kujdes këtyre paralajmërimeve. Sigurisht, për pjesën tjetër të vendit është lëshuar një paralajmërim portokalli… Është e rëndësishme ta merrni këtë shumë, shumë seriozisht,” thuhet në deklaratë.
