Misioni i SHBA-së në OKB ka akuzuar Francesca Albanesen për dërgim “korrespondence kërcënuese” deri te korporatat e mëdha amerikane
Misioni i SHBA-së në OKB denoncoi një raport të ri nga raportuesja speciale e OKB-së, Francesca Albanese, duke e akuzuar atë për zhvillim “lufte ekonomike” kundër firmave amerikane dhe globale duke i emëruar ato si bashkëpunëtore në pushtimin dhe veprimet ushtarake të Izraelit në territoret palestineze, transmeton Anadolu.
Në një deklaratë të martën, misioni tha se Albanese u kishte dërguar “korrespondencë kërcënuese dhjetëra subjekteve në gjithë botën, përfshirë korporata të mëdha amerikane”, duke i akuzuar ato si bashkëpunëtore në “shkelje të rënda të të drejtave të njeriut, aparteid dhe gjenocid”.
“Këto letra gjithashtu përbëjnë një fushatë të papranueshme të luftës politike dhe ekonomike kundër ekonomisë amerikane dhe asaj botërore”, tha deklarata, duke shtuar se akuzat e saj kundër Izraelit janë “të rreme dhe ofenduese”.
SHBA-ja gjithashtu përsëriti thirrjen ndaj Sekretarit të Përgjithshëm të OKB-së, Antonio Guterres, për të dënuar veprimet e Albaneses dhe për të kërkuar largimin e saj nga roli i raportueses speciale për situatën e të drejtave të njeriut në territoret palestineze të pushtuara që nga viti 1967.
“Shtetet e Bashkuara paralajmëruan se dështimi i vazhdueshëm për ta bërë këtë jo vetëm që do të diskreditonte Kombet e Bashkuara, por do të kërkonte edhe veprime të rëndësishme në përgjigje të sjelljes së keqe të znj. Albanese”, tha deklarata.
Raporti i Albaneses, i cili do të prezantohet në Gjenevë të enjten, thuhet se identifikon korporatat që dyshohet se po lehtësojnë pushtimin izraelit, përfshirë kompani të tilla si Microsoft, Alphabet, Amazon dhe Palantir që ofrojnë pajisje ushtarake, teknologji mbikëqyrjeje dhe infrastrukturë që mbështesin pushtimin e paligjshëm të tokës palestineze nga Izraeli.
