Ministri i Drejtësisë i Serbisë, Nenad Vujić, deklaroi se gjatë vizitës së sotme te Ratko Mladić, i ka informuar të gjitha autoritetet në Hagë se Serbia kërkon lirimin e tij për trajtim mjekësor për “arsye humanitare”, duke shtuar se do të komunikojë edhe me OKB-në lidhur me këtë çështje.
Vujić theksoi se Mladić ndodhet në spitalin e burgut dhe se është sjellë në takim në shtrat, duke shtuar se gjendja e tij është serioze dhe kërkon trajtim të avancuar.
“I kam informuar të gjithë në Hagë dhe kërkojmë lirimin për trajtim për arsye humanitare. Ekzistojnë të gjitha kushtet për këtë dhe ne si shtet do të ofrojmë edhe garanci shtesë nëse është e nevojshme. Kryetares së Mekanizmit, Graciela Gatti Santana, dhe gjyqtarit Garcia i kam thënë se çdo mbajtje e mëtejshme në burg do të ishte shkelje e të drejtave të njeriut”, tha Vujić.
Ai shtoi se nga Mekanizmi është kërkuar respektimi i rregullave që vlejnë në mbarë botën.
“E kemi ngritur edhe çështjen e Miço Stanišić, i cili ka vuajtur dy të tretat e dënimit, si dhe çështjen e Radovan Karadžić dhe faktin që familja e tij nuk mund ta vizitojë në Mbretërinë e Bashkuar. Megjithatë, çështja kryesore mbetet ajo e gjeneralit Ratko Mladić. Do të komunikoj me OKB-në për këtë rast. Nga vlerësimet tona mjekësore janë vërejtur mangësi të dukshme në trajtimin e tij dhe për këtë kam njoftuar edhe kryetaren e Mekanizmit”, tha Vujić.
Ai konfirmoi se ka mbështetur propozimin e avokatëve të Stanišić për të paraqitur sërish kërkesë për lirimin e parakohshëm.
Ratko Mladić së fundmi ka pësuar edhe një goditje tjetër në tru, ndërsa më herët ka kaluar disa të tilla. Ai vuan nga sëmundje të rënda kardiovaskulare, tension i lartë, dëmtime neurologjike dhe probleme me veshkat, për çka është shtruar disa herë në spital dhe i është nënshtruar trajtimeve të ndryshme mjekësore, përfshirë edhe ndërhyrje kirurgjikale në zemër dhe këmbë. Prej kohësh përdor edhe pelena.
Ratko Mladić është dënuar me burgim të përjetshëm nga International Criminal Tribunal for the former Yugoslavia për krime të shumta lufte gjatë agresionit në Bosnje dhe Hercegovinë, përfshirë edhe gjenocidin në Srebrenicë në korrik të vitit 1995.
Ndërkohë, Serbia në vitet e fundit ka strehuar disa kriminelë lufte që kanë ikur nga drejtësia në Bosnje dhe Hercegovinë, gjë që ka dëmtuar besimin ndaj këtij shteti. Po ashtu, ajo refuzon të ekstradojë anëtarët e SRS-së, Vjerica Radeta dhe Petar Jojić, të akuzuar për frikësim, kërcënim dhe ofrim ryshfeti ndaj dëshmitarëve në procesin kundër liderit të SRS-së dhe të dënuarit të Hagës Vojislav Šešelj.
