Presidenti amerikan Donald Trump mbërriti për një vizitë në Arabinë Saudite, ku në aeroport u prit nga princi trashëgimtar Mohammed bin Salman.
Para se të ulej avioni presidencial Air Force One, avionët F-15 të Forcave Ajrore Mbretërore Saudite ofruan një përcjellje nderi për avionin në të cilin ndodhej Trumpi.
Pasi zbarkoi në Rijad, liderët u tërhoqën në një sallë të madhe në aeroport, ku Trumpit dhe ndihmësve të tij iu shërbye kafe tradicionale arabe.
Udhëtimi i dytë i Trumpit jashtë vendit që kur mori sërish detyrën – i pari ishte në Romë për varrimin e Papa Françeskut – ndodh në një kohë tensionesh gjeopolitike.
Përveç presionit për zgjidhjen e luftës në Ukrainë, administrata Trump po përpiqet të krijojë një mekanizëm të ri ndihme për Gazën e shkatërruar nga lufta dhe po u bën thirrje kryeministrit izraelit Benjamin Netanyahu që të arrijë një marrëveshje të re për armëpushim.
Pritet që SHBA, Arabia Saudite, Katari dhe Emiratet e Bashkuara Arabe të shpallin investime potenciale prej disa triliona dollarësh. Arabia Saudite tashmë në janar është zotuar për investime prej 600 miliardë dollarësh në SHBA gjatë katër viteve të ardhshme, por Trump ka thënë se do të kërkojë një trilion të plotë.
