Një aeroplan rus i transportit Ilyushin-76 është rrëzuar në jugun e rajonit të Belgorod afër kufirit me Ukrainën. Ministria ruse e Mbrojtjes ka thënë se nga ky rrëzim janë shkaktuar gjashtëdhjetë e pesë viktima që sipas tyre ishin ushtarë ukrainas që ishin të burgosur nga rusët dhe që po transportoheshin për shkëmbim të të burgosurve, transmeton Gazeta Metro.
BBC ka thënë se këto informata nuk janë arritur të verifikoheshin në mënyrë të pavarur.
Agjencia e lajmeve Ria Novosti ka thënë se në përplasje kanë ndërruar jetë edhe stafi operacional në numër rreth 9 persona.
Gazeta Ukrainska Pravda e cila ka kontaktuar shefin e shtabit të gjeneralit ukrainas ka thënë se aeroplani po transportonte raketa për sistemet anti ajrore S-300 ndërsa nuk përmendi të burgosur lufte.
Video të shpërndara në rrjetet sociale tregojnë një aeroplan i cili është duke u rrëzuar përcjellur pastaj nga një shpërthim dhe në zjarr afër fshatit të Yablonovo rreth 70 kilometra nga qyteti i Belgorod rreth orës 11:00.
Disa media ukrainase kishin komentuar fillimisht se aeroplani Il-76 ishte rrëzuar nga forcat ukrainase por ato reporte më vonë janë fshirë
