Një valë videosh të publikuara nga të rinj saudite të maskuar, të cilët shprehin pakënaqësi ndaj kushteve të jetesës në Arabinë Saudite dhe bëjnë thirrje për rrëzimin e princit të kurorës Mohammed bin Salman, ka ndezur debat të madh në rrjetet sociale këtë javë.
Zëri i rinisë – përballë luksit dhe shtypjes
Videot – të publikuara në TikTok dhe më pas të shpërndara gjerësisht në platforma të tjera – tregojnë persona me fytyra dhe sy të mbuluar, zëra të modifikuar dhe mesazhe të fuqishme për atë që e quajnë “rënim i kushteve të jetesës” dhe mungesë mundësish ekonomike, ndërkohë që shteti shpenzon miliarda për festa, koncerte dhe projekte madhështore.
“Aktualisht po dëshmojmë një lëvizje të fuqishme që udhëhiqet nga rinia e lirë e këtij kombi, që me guxim po kërkon të drejtat legjitime: lirinë dhe të drejtën për të vendosur vetë për fatin e tyre”, tha një përdorues në reagim.
Të tjerë i përshkruan videot si “reflektim i zhgënjimit të thellë” të brendshëm dhe thanë se personat e maskuar përfaqësojnë zërat e shtypur brenda mbretërisë.
“Sauditi i maskuar nuk është thjesht një individ, por një simbol i dinjitetit… pas maskës fshihet një atdhe që ende nuk ka lindur”, u shpreh një komentues.
Reagime, solidaritet dhe frikë nga represioni
Pas publikimit të videove, u shfaqën edhe reagime solidarizuese. Por njëkohësisht, disa përdorues nisën fushata me hashtag #TradhtarëtEMbretërisë, duke i akuzuar të rinjtë si “agjentë të huaj” që duan të destabilizojnë Arabinë Saudite nga jashtë.
Ka gjithashtu shqetësime serioze për sigurinë e këtyre personave. Nën udhëheqjen e bin Salmanit që nga viti 2017, burgosjet për postime në rrjetet sociale, edhe nga llogari anonime, janë bërë praktikë e zakonshme. Ligjet kundër “krimeve kibernetike” dhe “terrorizmit” përdoren gjerësisht kundër kritikëve – shpesh me dënime shumëvjeçare dhe ndalime udhëtimi.
Revolta ndaj Vision 2030 dhe thirrje për ndryshim
Një temë e përbashkët në videot e publikuara është dënimi i shpenzimeve publike për koncerte, festivale dhe projekte luksoze, që sipas tyre, vijnë në kurriz të shërbimeve bazë dhe ekonomisë publike. Ata kritikojnë edhe atë që e konsiderojnë si shthurje morale, përmes ngjarjeve publike që sipas tyre janë në kundërshtim me vlerat islame.
“E dimë se ka shumë njerëz të lirë që dëshirojnë ndryshim paqësor – një fund të tiranisë së familjes Al Saud, që e ka keqtrajtuar popullin me pasurinë e vet, i ka provokuar me ide dhe projekte mashtruese që kurrë nuk janë realizuar”, thuhet në një video.
Ultimatum i qartë princit Salman
Në disa video lëshohet kërcënimi për protesta masive nëse nuk ndalet represioni dhe nuk ndodh reformë.
Një burrë u shpreh qartë: “Do të dalim në rrugë me demonstrata dhe marshime nëse vazhdoni të mbyllni njerëz.”
Një tjetër tha troç:“Kjo është një mesazh drejtpërdrejt për Mohammed bin Salman: rënia jote do të vijë nga duart e popullit tënd.”
