Vajza e mbretit spanjoll Felipe VI, Princesha Leonor, sot do të mbushë 18 vjeç, gjë që do t’i japë asaj detyra shtesë në jetën politike të Spanjës.
Si vajza e madhe e Felipe VI dhe mbretëreshës Letizia, Leonor është edhe trashëgimtare e kurorës spanjolle dhe sot ajo do të bëjë zyrtarisht betimin për Kushtetutën spanjolle në parlamentin e shtetit.
“Kur trashëgimtarja e fronit të mbushë 18 vjeç, ajo do të betohet për besnikëri ndaj mbretit”, shkruan media spanjolle.
Siç konfirmohet nga Kongresi spanjoll, princesha do të thotë të njëjtat fjalë që tha babai i saj më 30 janar 1986 kur bëri betimin.
“Betohem se do të kryej me besnikëri detyrat e mia, do të mbroj Kushtetutën dhe ligjet dhe do të respektoj të drejtat e qytetarëve, komuniteteve autonome dhe do të jem besnik ndaj mbretit,” tha ai në atë kohë.
Meqë ra fjala, media spanjolle ndoqi nga afër përfundimin e trajnimit bazë të princeshës në akademinë ushtarake në Zaragoza, ku ajo filloi një kurs tre-vjeçar për oficerët.
Detyrat e saj dolën në pah kur kryesoi çmimin Princesha e Asturias më 20 tetor dhe ndër të tjera nderoi shkrimtarin Haruki Murakami dhe aktoren Meryl Streep.
Kur bëhet fjalë për karakterin dhe karizmën e saj politike, shumë gazetarë në Spanjë theksojnë se Leonor ka shumë tipare të babait të saj Felipe.
“Nga babai i saj, mbreti Felipe, ajo trashëgoi përkushtimin e tij ndaj kurorës, sjelljet jashtëzakonisht të mira dhe një buzëqeshje dhe kënaqësi të vazhdueshme”, tha gazetari Jesus Reyes.
Betimi në Kongresin Spanjoll është planifikuar për në orën 11:00 dhe në këtë ngjarje do të marrë pjesë elita politike e vendit, duke përfshirë anëtarë të qeverisë dhe kryeministrin Pedro Sanchez.
