Presidenti i SHBA-së, Donald Trump, tha se do të shqyrtojë mundësinë e deportimit të Elon Muskut, njeriut më të pasur në botë dhe drejtuesit ekzekutiv të Tesla-s dhe SpaceX, në kulmin e grindjes gjithnjë e më të ashpër mes dy bashkëpunëtorëve dikur më të ngushtë.
Korrespondentja e Daily Mail, Emily Goodin, publikoi në platformën X se e kishte pyetur Trumpin nëse planifikon të deportojë Muskun, dhe presidenti iu përgjigj:
“Do të duhet ta shqyrtojmë.”
Më pas, duke iu përgjigjur gazetarëve, Trump shtoi:
“Nuk e di. Do ta shohim. Ndoshta do të duhet të dërgojmë DOGE-in tek Elon. E dini se çfarë është DOGE? DOGE është një “krije” që ndoshta duhet të kthehet dhe ta ‘gëlltisë’ Elonin.”
Pas këtij komenti të pazakontë fshihet një tension serioz politik dhe financiar. Trump e kritikoi ashpër Muskun ditët e fundit për komente rreth ligjit gjithëpërfshirës për uljen e taksave dhe rritjen e shpenzimeve, që aktualisht shqyrtohet në Senatin amerikan.
“Ndoshta duhet ta kërkojmë nga DOGE-i të kontrollojë me kujdes subvencionet që kanë marrë firmat e Muskut. Elon ka marrë më shumë subvencione se askush tjetër në histori. Pa subvencione, ai do të duhej të mbyllte kompaninë dhe të kthehej në Afrikën e Jugut. Pa raketa, pa satelitë, pa makina elektrike. Shteti ynë do të kursente një pasuri!” — shkroi Trump në platformën e tij Truth Social.
DOGE, shkurtim për “Department of Government Efficiency” (Departamenti për Efikasitetin Qeveritar), është një program federal kontrovers që më parë udhëhiqej nga vetë Musk dhe që synonte uljen e shpenzimeve administrative. Megjithatë, Trump tani thotë se pikërisht ky departament duhet të hetojë nëse kompanitë e Muskut, si Tesla dhe SpaceX, kanë përfituar subvencione tepër të mëdha.
Pas javësh heshtjeje, Musk reagoi ashpër të shtunën, duke quajtur ligjin “plotësisht të çmendur dhe shkatërrues” dhe duke ftuar për krijimin e një partie të re politike:
“Jemi një vend me një parti të vetme – Partia e Porky Pig!” — shkruajti ai në X.
Kjo shkëmbim i ashpër mes Trumpit dhe Muskut vjen megjithëse Musk ka dhuruar gati 300 milionë dollarë për fushatën e Trumpit dhe ka luajtur rol kyç në iniciativën DOGE. Tani aleanca e tyre është kthyer në përplasje të hapur.
Trump paralajmëroi se Musk “mund të humbasë edhe më shumë” nëse vazhdon me kritikat:
“Pa mbështetjen e qeverisë, s’do të kishte taksi vetëdrejtuese as nisje në hapësirë.”
Aksionet e Tesla-s ndjenë tashmë efektet — ranë mbi gjashtë përqind para hapjes së bursës — dhe analistët paralajmërojnë se kërcënimi i Trumpit për heqjen e subvencioneve mund të rrezikojë seriozisht ambiciet e Muskut. Trump dëshiron që ligji të miratohet para 4 korrikut, Ditës së Pavarësisë, pavarësisht vlerësimeve se mund të rrisë borxhin publik amerikan me 3.3 trilionë dollarë.
