Palestinezët kundërshtojnë çdo përpjekje për t’i larguar ata nga Rripi i Gazës dhe deklarojnë se “më shumë preferojnë të vdesin në Gaza, sesa të migrojnë në Sinai”
Palestinezët që u strehuan në qytetin Rafah në jug të Rripit të Gazës, ku Izraeli vazhdon sulmet e tij pavarësisht paralajmërimeve ndërkombëtare, thanë se nuk do të largohen nga rajoni pavarësisht shqetësimeve për një sulm tokësor, raporton Anadolu.
Më shumë se 100 persona u vranë dhe qindra u plagosën në sulmet e kryera nga ushtria izraelite në qytetin Rafah gjatë natës.
Burimet lokale thanë se avionët luftarakë izraelitë kryen rreth 40 sulme ajrore, të shoqëruara me zjarr intensiv artilerie dhe zjarr intensiv detar nga anijet luftarake, duke synuar veçanërisht shumë shtëpi dhe xhami ku ishin strehuar njerëzit e zhvendosur.
Qyteti Rafah, i vendosur në kufirin me Egjiptin në jug të Rripit të Gazës, strehon afërsisht gjysmën e popullsisë së Gazës, e cila ka një popullsi prej 2.3 milionë banorësh. Mijëra njerëz janë zhvendosur për shkak të sulmeve izraelite, duke u strehuar në qytet.
Ministri izraelit i Mbrojtjes, Yoav Gallant, në deklaratën e tij gjatë vizitës së tij tek trupat izraelite në rajonin Khan Younis të Rripit të Gazës më 1 shkurt, tha se ata do të zhvendosnin sulmet e tyre tokësore në qytetin Rafah në kufirin me Egjiptin.
“Ne më shumë preferojmë të vdesim në Gaza, sesa të migrojmë në Sinai”
Palestinezët që strehohen në Rafah janë të shqetësuar se ushtria izraelite do të nisë një ofensivë tokësore që mund të çojë në vrasje masive dhe krime kundër civilëve.
Duke folur për Anadolu, palestinezët theksuan se kundërshtuan çdo përpjekje për t’i larguar ata nga Rripi i Gazës dhe deklaruan se “më shumë preferojnë të vdesin në Gaza, sesa të migrojnë në Sinai”.
“Ne do të vdesim këtu. Ne nuk do të migrojmë në Sinai të Egjiptit. Ata na detyruan të largohemi nga shtëpitë tona duke na bombarduar, përndryshe ne nuk do të dilnim nga shtëpitë tona. Ata bombarduan Shkollën Ebu Bekr al-Siddik dhe djali im ra dëshmor aty”, tha 62-vjeçari Raid al-Shurafa nga Gaza.
