Kryeministri i Hungarisë, Viktor Orban, shprehu publikisht mbështetjen për kandidatin për president të Rumanisë, George Simion, por vetëm 24 orë më vonë u detyrua t’i tërhiqte fjalët.
Orban, gjatë një fjalimi në qytetin Tihany, tha se “qëndron plotësisht pas thirrjes së Simionit për një Evropë të krishterë.”
Megjithatë, vetëm një ditë më vonë, zyra e Orbanit njoftoi se “Hungaria nuk dëshiron të përzihet në çështjet e një shteti sovran.”
Ky ndryshim erdhi pas bisedës së Orbanit me Kelemen Hunor, kryetar i partisë që përfaqëson pakicën hungareze në Rumani.
Hunor duket se i ka tërhequr vëmendjen Orbanit për të kaluarën problematike të Simionit, e cila përfshin deklarata kundër-hungareze. Ndër të tjera, Simion është shquar në të kaluarën për qëndrime të ashpra kundër të drejtave të pakicave në Rumani.
“Simion nuk është as i krishterë e as sovranist. Ai është anti-hungarez,” tha Hunor në një video-mesazh pas raundit të parë të zgjedhjeve presidenciale, duke u bërë thirrje mbi një milion hungarezëve në Rumani që të votojnë për kandidatin centrist Nicusor Dan.
Kjo ishte hera e parë që nga viti 2018 që partia e Hunorit e ka kritikuar haptazi Orbanin, i cili më pas e rishikoi shpejt qëndrimin e tij.
Simion fitoi pak më shumë se 40% të votave në raundin e parë, ndërsa Dan mori 21%.
Megjithatë, në raundin e dytë, që do të mbahet më 18 maj, pritet që kandidatët e tjerë t’u bëjnë thirrje votuesve që të votojnë kundër Simionit, duke qenë se ai është kandidati i vetëm i ekstremit të djathtë në këto zgjedhje. Bashkimi i forcave kundër tij mund ta kthejë raundin e dytë në një garë shumë të ngushtë për presidencën.
