“Do të ishte kundër standardeve ndërkombëtare dhe jashtë BE-së, duke mos i dhënë askujt mundësinë për të kontrolluar kushtet e njerëzve të ndaluar atje”, tha kreu i partisë italiane pro-evropiane +Europa.
Partitë opozitare të Italisë kanë kritikuar marrëveshjen e nënshkruar midis Romës dhe Tiranës për krijimin e qendrave të emigrantëve në territorin shqiptar nën juridiksionin italian, duke theksuar se ato do të shkelin rregullat humanitare, transmeton Anadolu.
Kryetarja e Partisë Demokratike (PD), Elly Schlein, në një intervistë tha se marrëveshja e vulosur nga qeveria e krahut të djathtë të udhëhequr nga kryeministrja Giorgia Meloni “duket një shkelje e hapur e ligjeve ndërkombëtare dhe evropiane”.
Schlein ftoi kryeministren Meloni që të “bindë aleatët e saj nacionalistë evropianë që të ndajnë pritjen (e azilkërkuesve) dhe të mos e lënë Italinë të vetme, në vend që të çojë menaxhimin e emigrantëve në det të hapur”.
Sipas marrëveshjes, të nënshkruar dje në Romë nga kryeministri i Shqipërisë, Edi Rama dhe kryeministrja Meloni, deri në 30 mijë emigrantë në vit, të shpëtuar në det nga autoritetet italiane, do të transferohen në Shqipëri.
Marrëveshja nuk do të zbatohet për emigrantët e shpëtuar nga anijet e kërkim-shpëtimit të organizatave joqeveritare.
Italia do të trajtojë procedurat e zbarkimit dhe identifikimit, si dhe do të ngrejë një qendër të parë të pritjes dhe kontrollit në portin veriperëndimor shqiptar të Shëngjinit, ndërsa në zonën e Gjadrit do të ngrejë një qendër ndalimi dhe riatdhesimi për procedurat e mëtejshme.
Kreu i partisë italiane pro-evropiane +Europa, Riccardo Magi, nga ana e tij, tha se qendrat e reja në Shqipëri rrezikojnë të shndërrohen në një “lloj Guantanamo italiane”, duke iu referuar bazës ushtarake amerikane që u shndërrua në një simbol ndërkombëtar të torturës, dorëzimit dhe ndalimit të pacaktuar.
“Do të ishte kundër standardeve ndërkombëtare dhe jashtë BE-së, duke mos i dhënë askujt mundësinë për të kontrolluar kushtet e njerëzve të ndaluar atje”, tha kreu i partisë italiane pro-evropiane +Europa.
Më herët, Komisioni Evropian kërkoi informacion shtesë për detajet e marrëveshjes mes Romës dhe Tiranës.
“Ne jemi në kontakt me autoritetet italiane. Ne kemi kërkuar të marrim detaje të marrëveshjes së emigracionit me Shqipërinë. Para se të komentojmë më tej, ne duhet të kuptojmë saktësisht se cili është qëllimi”, tha Anitta Hipper, zëdhënëse e Komisionit Evropian.
Kryeministrja italiane vlerësoi marrëveshjen, duke theksuar se ajo mund të bëhet një “model bashkëpunimi midis BE-së dhe vendeve jo anëtare të BE-së për menaxhimin e flukseve të emigracionit”.
