Olivier H., i dyshuar për vrasjen e një besimtari në një xhami në jug të Francës gjatë faljes së xhumasë, është dorëzuar në polici në Itali. Ndërkohë që vazhdonte kërkimi për të, qindra njerëz u mblodhën për të nderuar viktimën dhe për të dënuar islamofobinë.
I dyshuari, i identifikuar si Olivier H., u dorëzua në një stacion policor në Pistoia, në rajonin pranë Firences në Itali, vonë të dielën në mbrëmje, njoftoi prokurori Abdelkrim Grini nga Alès, në departamentin Gard ku ndodhi vrasja.
Më shumë se 70 hetues u mobilizuan për të lokalizuar dhe arrestuar të dyshuarin, i cili ishte filmuar nga kamerat e sigurisë në sallën e lutjeve të xhamisë Khadidja në qytetin e vogël La Grand-Combe, ku ai kishte goditur disa herë Aboubakar Cissen.
I dyshuari, i cili më parë nuk kishte pasur kontakte me policinë, është lindur në vitin 2004 në Lyon, në një familje me origjinë nga Bosnja dhe Hercegovina.
Sipas ministrit francez të Brendshëm, Bruno Retailleau, i dyshuari kishte regjistruar një video pas vrasjes dhe e kishte shpërndarë në rrjetet sociale, në të cilën deklaronte se donte të vriste më shumë njerëz dhe të bëhej “vrasës serial”.
Të dielën, Retailleau kërkoi që të rritet siguria përreth të gjitha xhamive në Francë.
Prokurori Grini deklaroi se, edhe pse islamofobia është një nga motivet që po shqyrtohen, “disa elementë” sugjerojnë se “mund të mos jetë motivi kryesor… ose i vetmi motiv”.
Islamofobia u përmend më së shpeshti si motiv nga politikanët dhe qindra qytetarë që u mblodhën të dielën.
“Racizmi dhe urrejtja mbi baza fetare nuk kanë vend në Francë. Liria e fesë nuk mund të shkelet”, shkroi presidenti francez Emmanuel Macron të dielën, duke shprehur mbështetje për “bashkëqytetarët tanë myslimanë”.
