Gazetarët në Gaza së shpejti do të nderohen me një nga çmimet më prestigjioze ndërkombëtare për lirinë e shtypit, si vlerësim për punën e tyre në dokumentimin e luftës dhe vuajtjeve në këtë territor të rrethuar, nën kërcënimin e vazhdueshëm të sulmeve ajrore izraelite.
Shoqata Botërore e Botuesve të Lajmeve (WAN-IFRA) njoftoi se çmimi “Pena e Artë e Lirisë” për vitin 2026 do t’u ndahet gazetarëve të agjencive AFP, AP dhe Reuters, të cilët vazhdojnë të raportojnë pa u lodhur nga Gaza.
Organizata theksoi se korrespondentët dhe gazetarët lokalë kanë vazhduar të ofrojnë raportim të qëndrueshëm dhe profesional në kushte jashtëzakonisht të vështira, duke rrezikuar jetën e tyre çdo ditë.
“Për më shumë se dy vjet e gjysmë, gazetarët në Gaza kanë dokumentuar vdekjen, shkatërrimin dhe vuajtjet njerëzore në një mënyrë të paprecedentë”, thuhet në arsyetimin zyrtar të çmimit.
Sipas WAN-IFRA-s, ata janë njëkohësisht viktima të konfliktit dhe kronikanë të luftës që zhvillohet rreth tyre.
Ceremonia e ndarjes së çmimeve do të mbahet në Marseille të Francës, ku WAN-IFRA organizon këtë vit Kongresin Botëror të Mediave.
Në mesin e të pranishmëve do të jetë edhe fotografi i njohur i AFP-së, Mohammed Abed, i cili kaloi muaj të tërë duke raportuar nga terreni në Gaza përpara se të zhvendosej në Kajro në vitin 2024.
WAN-IFRA theksoi se ky çmim njeh qëndrueshmërinë e jashtëzakonshme të punonjësve palestinezë të medias, por njëkohësisht nderon edhe të gjithë ata që janë vrarë ose plagosur gjatë kryerjes së detyrës së tyre profesionale.
Ky vlerësim vjen në një kohë kur organizatat ndërkombëtare paralajmërojnë për nivelin e paprecedentë të rrezikut me të cilin përballen gazetarët.
Sipas të dhënave të Reporterëve pa Kufij (RSF), që nga tetori i vitit 2023, forcat izraelite kanë vrarë më shumë se 220 gazetarë, ndërsa të paktën 70 prej tyre kanë humbur jetën drejtpërdrejt gjatë raportimit në terren, duke mbajtur jelekët e kaltër mbrojtës me mbishkrimin “PRESS”.
Çmimi “Pena e Artë e Lirisë” ndahet që nga viti 1961 për individë ose grupe që kanë dhënë kontribut të jashtëzakonshëm në mbrojtjen dhe promovimin e lirisë së shtypit.
