Netanyahu urdhëroi sulme intensive në Gaza, akuzoi Hamasin për shkelje të armëpushimit

Netanyahu urdhëroi sulme intensive në Gaza, akuzoi Hamasin për shkelje të armëpushimit

Kryeministri izraelit, Benjamin Netanyahu, pasi akuzoi Hamasin për shkelje të armëpushimit, i urdhëroi forcat e armatosura të ndërmarrin sulme intensive në Rripin e Gazës.

“Pas konsultimeve të sigurisë, kryeministri Netanyahu i ka urdhëruar menjëherë forcat ushtarake të realizojnë sulme të fuqishme në Rripin e Gazës,” thuhet në deklaratën e Zyrës së tij.

Izraeli akuzoi Hamasin se ka “inskenuar” kthimin e trupave dhe “rivarrosjen e mbetjeve,” ndërsa të dyja palët po përshkallëzojnë akuzat reciproke për shkelje të armëpushimit në Gaza.

“Hamas po gënjen. Ata e dinë se ku ndodhen pengjet e mbetura. Gërmimet e inskenuara nuk janë vetëm keqdashëse – këto shkelje rrezikojnë armëpushimin. Pamjet nga dronët tregojnë Hamasin duke zhvendosur dhe rivarrosur mbetjet trupore, për të inskenuar më pas një ‘zbulim’ të rremë përpara Kryqit të Kuq,” njoftoi Ministria e Jashtme izraelite.

Më herët, Netanyahu kishte deklaruar se mbetjet njerëzore që Hamasi kishte dorëzuar gjatë natës i përkisnin një pengu, trupin e të cilit ushtria izraelite e kishte gjetur tashmë më parë.

Netanyahu thirri komandantët ushtarakë për të vendosur mbi “hapat e ardhshëm të Izraelit”, pas së cilës dha urdhrin për sulme.

Sipas marrëveshjes midis Hamasit dhe Izraelit, të arritur më 10 tetor, grupi palestinez duhej të dorëzonte të gjithë pengjet e gjallë si dhe trupat e të vdekurve e të vrarëve të rrëmbyer më 7 tetor 2023.

Sipas pretendimeve të Izraelit, Hamasi po vonon dorëzimin e mbetjeve të pengjeve izraelite, ndërsa grupi palestinez pohon se disa trupa nuk mund të nxirren për shkak të rrënojave në Gaza. Të gjithë pengjet e gjallë janë liruar sipas marrëveshjes.

Që nga hyrja në fuqi e armëpushimit, të dyja palët janë akuzuar disa herë për shkelje të tij, por sulmet që Netanyahu ka urdhëruar tani ka gjasa të konsiderohen si kolapsi përfundimtar i marrëveshjes.

Kategoritë
BotaLajme