Në një sulm izraelit me dron ndaj një kampi për të zhvendosurit në zonën Muwasi, në jug të Gazës, të shtunën u vranë një vëlla dhe një motër, ndërsa të paktën shtatë persona u plagosën.
Sipas spitalit Nasser, në mesin e të vrarëve janë 15-vjeçarja Islam Moussa dhe vëllai i saj 30-vjeçar, Abdullah Moussa. Sulmi u krye ndaj tendave ku ishin strehuar palestinezë të zhvendosur në kampin e gjerë Muwasi, ndërsa të plagosurit u dërguan në spital.
Ushtria izraelite konfirmoi se kishte goditur zonën e Muwasit, duke thënë se objektiv ishte një pjesëtar i Hamasit, por nuk dha menjëherë më shumë detaje. Në oborrin e spitalit, familjarët vajtonin trupat e mbuluar me qefinë të bardhë.
Po të njëjtën ditë u raportua edhe për një shpërthim tjetër në qytetin e Gazës. Sipas spitalit Shifa, një sulm izraelit goditi një tendë me palestinezë të zhvendosur në pjesën perëndimore të qytetit, ku u plagosën të paktën 12 persona. Shërbimi i ambulancës i Gjysmëhënës së Kuqe Palestineze njoftoi se dy persona pësuan lëndime të rënda, ndërsa shumica e të plagosurve ishin gra.
Ushtria izraelite nuk u deklarua menjëherë për këtë sulm, prandaj nuk ishte e qartë se cili ishte objektivi.
Edhe pse në tetor u arrit një armëpushim i brishtë, i cili ndali luftimet më të ashpra mes Izraelit dhe Hamasit, sulmet dhe bombardimet izraelite në të gjithë Gazën janë pothuajse të përditshme. Izraeli dhe Hamasi akuzojnë njëri-tjetrin për shkelje të armëpushimit.
Ministria e Shëndetësisë në Gaza, e cila vepron nën qeverinë e Hamasit, thotë se që nga fillimi i armëpushimit janë vrarë më shumë se 1.030 persona, mes tyre edhe mbi 250 fëmijë. Sipas të njëjtit burim, që nga fillimi i luftës pas sulmit të Hamasit në jug të Izraelit më 7 tetor 2023, në ofensivën izraelite në Gaza janë vrarë më shumë se 73.050 palestinezë.
