Gjermania dhe Mbretëria e Bashkuar do të nënshkruajnë më 17 korrik një marrëveshje mbrojtjeje që përfshin një klauzolë për ndihmë të ndërsjellë në rast të kërcënimit ndaj njërës prej tyre.
Ky raport u publikua pothuajse një vit pas deklaratës së përbashkët të kryeministrit britanik Keir Starmer dhe kancelarit gjerman të asaj kohe Olaf Scholz, në të cilën premtonin bashkëpunim më të ngushtë, nga tregtia te siguria.
Sipas Reuters, kjo marrëveshje e gjerë tani është në fazën përfundimtare, ku fusha kryesore është mbrojtja.
Ajo do të përfshijë një nen që thotë se çdo kërcënim strategjik ndaj njërës vend konsiderohet kërcënim edhe ndaj tjetrit, dhe pritet të nënshkruhet më 17 korrik, raportoi agjencia me citim të dy zyrtarëve me bazë në Londër.
Edhe pse të dy vendet janë të përkushtuara ndaj NATO-s, ky traktat mbrojtjeje tregon një lëvizje të shteteve evropiane—përfshirë Gjermaninë nën kancelarin Friedrich Merz—drejt bashkëpunimit më të ngushtë dhe zvogëlimit të varësisë nga SHBA-ja e presidentit Donald Trump.
Një zëdhënës i Ministrisë gjermane të Mbrojtjes tha të mërkurën në një konferencë për shtyp në Berlin se nuk kishte informacione të reja në lidhje me raportin e Politico-s.
Gjermania dhe Mbretëria e Bashkuar nisën në gusht 2024 negociatat për një marrëveshje dypalëshe që mbulon një gamë të gjerë çështjesh, nga bashkëpunimi në mbrojtje e siguri te punësimi dhe rritja ekonomike.
“Jemi në fazën përfundimtare të finalizimit të marrëveshjes,” tha zëdhënësi i Ministrisë së Jashtme në të njëjtën konferencë, duke shtuar se kabineti gjerman do ta miratojë atë përpara fundit të korrikut.
