Aksidenti ndodhi pranë Kladanjit, kur automjeti doli nga rruga dhe përfundoi në lumë. Edhe pse ende nuk ka konfirmim zyrtar, shumë media raportuan se viktima është Ostoja Stanišić dhe se është urdhëruar autopsi.
Në aksidentin e ndodhur dje në Kladanj humbi jetën Ostoja Stanišić, i cili më herët ishte dënuar nga Gjykata e Bosnje dhe Hercegovinës me pesë vjet burg për krime që lidhen me gjenocidin në Srebrenicë.
Sipas aktgjykimit të formës së prerë, Stanišić u shpall fajtor se, në cilësinë e komandantit të Batalionit të 6-të të Brigadës së Zvornikut, kishte ndihmuar me vetëdije pjesëtarët e ushtrisë dhe policisë së RS-së, përfshirë Radovan Karadžić dhe Ratko Mladić, në zbatimin e planit për largimin e përhershëm dhe të detyruar të popullsisë civile boshnjake nga zona e mbrojtur e OKB-së në Srebrenicë. Gjatë këtyre ngjarjeve, deri në 40.000 civilë boshnjakë u zhvendosën dhe mbi 7.000 burra e djem boshnjakë u vranë.
Gjykata konstatoi gjithashtu se më 14 dhe 15 korrik 1995, pjesëtarë të Batalionit të 6-të, nën mbikëqyrjen e Stanišićit, morën pjesë në pranimin dhe sigurimin e qindra burrave të kapur nga Srebrenica, të mbajtur në kushte çnjerëzore në shkollën e fshatit Petkovci, ku u raportua se të paktën 20 persona u vranë.
Në gjykimin e parë Stanišić ishte dënuar me 11 vjet burg, por pas rigjykimit dënimi iu ul në pesë vjet. Në vitin 2020 ai u lirua pasi kishte vuajtur dy të tretat e dënimit.
