Sondazhet e opinioneve sugjerojnë që shumica e zviceranëve do të mbështesin ndalimin e mbulesës së fytyrës dhe aktivistët argumentojnë se ka të bëjë me Islamofobinë dhe kontrollimin e grave në sferën publike transmeton Gazeta e Re.
Zvicra do të votojë më 7 mars në një referendum publik në lidhje me ndalimin e niqabit, burkës dhe mbulesave të tjera të fytyrës, të cilët kritikët i quajnë si “thellësisht raciste dhe seksiste” për veçimin dhe shënjestrimin e grave muslimane dhe shkeljen e të drejtave themelore të njeriut.
Niqabi, një mbulesë fytyre, është një formë e praktikës fetare nga disa gra myslimane. Shumica e atyre që mbajnë niqab në Zvicër janë turistë që vijnë në vendin Alpin për pushime, gjë që bëri që qeveria zvicerane në janar të nxisë votuesit të refuzojnë ndalimin.
“Shumë pak njerëz në Zvicër mbajnë një mbulesë të plotë të fytyrës”, tha qeveria në një deklaratë. Numri i përgjithshëm i vlerësuar i bartësve të niqabit në Zvicër varion nga 36 në 130 individë.
“Një ndalim në të gjithë vendin do të minonte sovranitetin e kantoneve, do të dëmtonte turizmin dhe do të ishte i padobishëm për grupe të caktuara të grave.”
Ndërsa qeveria e kundërshton atë për arsye ekonomike, aktivistët argumentojnë se ka të bëjë më shumë me Islamofobinë dhe kontrollimin e grave në sferën publike.
“Është seksiste, sepse nga njëra anë, ne duam të kontrollojmë trupat e grave dhe, nga ana tjetër, ne mohojmë aftësinë e tyre për vetëvendosje. Është raciste, sepse po stigmatizon kundër myslimanëve në Zvicër, tha Meriam Mastour, avokaet dhe anëtare e Les Foulards Violets, një kolektiv feminist musliman në Zvicër, i cili ka bërë fushatë kundër ndalimit.
Bazuar në sondazhet e fundit të kryera javën e kaluar, ata që refuzojnë ndalimin e mbulesës janë rritur me 6 pikë përqindje që nga sondazhi i mëparshëm më 10 shkurt.
Sidoqoftë, 59 përqind e atyre me të drejtë vote mund të mbështesin ende ndalimin.
“Pavarësisht mbështetjes në rënie, miratimi i nismës mbetet i mundshëm, sipas modelit të parashikimit, i cili përfshin të dhëna historike dhe sondazhet e mëparshme”, është thënë.
Kjo përsëritet nga Korporata Zvicerane e Transmetimit Publik, e cila sugjeron që ndalimi mund të kalojë lehtësisht pa një “shqetësim politik”, “pasi ndjenjat anti-islamike nuk janë më tabu”.
Zvicra nuk do të ishte vendi i parë evropian që goditi liritë fetare dhe veshjen e grave muslimane: Franca, Danimarka, Hollanda, Austria, Belgjika, Letonia dhe Bullgaria kanë kaluar të gjitha legjislacionet që synojnë veshjen e grave muslimane në veçanti.
Ndalimi i niqabit u iniciua nga Komiteti Egerkingen, i formuar më 2007 nga një grup politikanësh të ekstremit të djathtë nga Partia Popullore Zvicerane (SVP), partia kryesore e ekstremit të djathtë të Zvicrës.
Komiteti Egerkingen drejtoi fushatën e diskutueshme për ndalimin e minareve mbi një dekadë më parë, e cila kaloi me mbi 57 përqind të votave midis atyre që votuan më 2009. SVP bëri thirrje për ndalimin e niqabit, ose të perçeve së shpejti.
Në vitin 2016, Komiteti Egerkingen filloi mbledhjen e nënshkrimeve si pjesë e një fushate të ndalimit të perçes. Sistemi i demokracisë së drejtpërdrejtë të Zvicrës lejon referendume për ndryshimet e propozuara në kushtetutë nëse mbështetësit mbledhin më shumë se 100,000 nënshkrime.
Mbështetësit e fushatës argumentuan se ndalimi i mbulesave të fytyrës mund të parandalonte “kërcënimet” ndaj “sigurisë publike” dhe “terrorizmin”, por mbajtja e maskave është e detyrueshme në Zvicër si masa mbrojtëse kundër pandemisë së koronavirusit, siç janë në shumë vende tani.
Shumë e kanë theksuar situatën si hipokrite.
“Shumica e popullsisë zvicerane, deri vonë, nuk mund ta kuptonin se dikush bën zgjedhjen për të mbuluar fytyrën. Sot, të gjithë jemi të maskuar në ndërveprimet tona shoqërore. Ky shembull tregon se vizioni që kemi për një veshje ose një qëndrim varet nga konteksti social, kulturor dhe shëndetësor në të cilin evoluojmë”, tha Mastour.
“Mosarritja për të kuptuar zgjedhjen e një personi nuk duhet ta bëjë atë domosdoshmërisht të pavlefshme ose të lejojë që ajo të shtypet.” /Gazetaere
