Ministri izraelit për Diasporën, Amichai Chikli, deklaroi se Izraeli “herët a vonë do të hyjë në luftë me Sirinë”, duke pretenduar se “Turqia dhe Siria janë zhvillime shumë më shqetësuese sesa Irani”.
Turqia vazhdon të shqetësojë Izraelin, veçanërisht për shkak të rolit të saj aktiv politik në Lindjen e Mesme.
Në një intervistë për radion ushtarake izraelite, Chikli komentoi zhvillimet e fundit në rajon.
“Nëse duhet, dimë t’i themi ‘jo’ SHBA-së”
Duke folur për debatet lidhur me tërheqjen e ushtrisë izraelite nga jugu i Libanit pas marrëveshjes mes SHBA-së dhe Iranit, Chikli tha:
“Nëse kthehemi te Vija Blu (vija kufitare e Kombeve të Bashkuara mes Libanit dhe Izraelit), kjo do të ishte një dështim. Nuk mendoj se do të tërhiqemi. Nëse është e nevojshme, ne dimë t’i themi ‘jo’ edhe SHBA-së.”
“Turqia është më shqetësuese se Irani”
Ministri Chikli, anëtar i partisë në pushtet Likud, pretendoi se Izraeli do të përballet me Sirinë në të ardhmen.
“Turqia dhe Siria janë zhvillime shumë më shqetësuese sesa Irani”, tha ai.
“Më shqetëson shumë më tepër boshti Turqi-Katar-Pakistan”
Në një deklaratë të mëparshme për radion 103 FM, Chikli foli edhe për situatën ekonomike të Iranit, e cila sipas tij është dëmtuar nga sanksionet dhe konfliktet e vazhdueshme.
Ai tha se marrëveshja e re është shqetësuese, por shtoi:
“Gjëja që më shqetëson më së paku është ringjallja e ekonomisë iraniane. Ajo që më shqetëson shumë më tepër është boshti që po formëson këtë marrëveshje: Turqia, Katari dhe Pakistani. Po shohim para syve tanë një bosht të ri që po ngrihet.”
Këto deklarata vijnë në një kohë kur tensionet dhe rivalitetet gjeopolitike në Lindjen e Mesme vazhdojnë të jenë të larta.
