Më shumë se një milion njerëz mbushën sot rrugët pranë njërit prej shesheve kryesore të Madridit për t’iu bashkuar Papa Leonit në një meshë të mbajtur në ambient të hapur, ngjarja më e madhe e vizitës së tij shtatëditore në Spanjë.
Papa Leoni mbërriti në aktivitet me papamobilin e tij karakteristik të bardhë, ndërsa disa nga të pranishmit hodhën petale lulesh përgjatë rrugës ku ai kaloi.
Sipas të dhënave zyrtare të Vatikanit dhe organizatorëve lokalë, në shesh dhe në rrugët përreth ishin mbledhur rreth 1,2 milionë njerëz.
Gjatë predikimit të tij, Papa Leoni u bëri thirrje besimtarëve që ta jetojnë fenë e tyre katolike përmes ndihmës aktive ndaj të tjerëve.
Ai theksoi se Zoti “identifikohet drejtpërdrejt me të varfrit, të shtypurit, të vetmuarit dhe të braktisurit”.
Më herët gjatë ditës, kryetari i Bashkisë së Madridit i dorëzoi Papës çelësin e qytetit. Me këtë rast, kreu i Kishës Katolike la një mesazh në librin e mysafirëve, duke shprehur shpresën që Madridi “të mbetet një qytet mikpritës dhe gjithëpërfshirës, ku jeta shoqërore frymëzohet nga vlerat e vërteta njerëzore”.
Papa e nisi vizitën e tij të shtunën, me takime me migrantë dhe persona të pastrehë. Më pas ai mori pjesë në një vigjilje me rreth 600 mijë të rinj në Madrid.
Kjo vizitë, e cila zhvillohet nga 6 deri më 12 qershor, është gjithashtu vizita e tij e parë zyrtare në një shtet anëtar të Bashkimit Evropian jashtë Italisë.
Pas Madridit, Papa do të vizitojë Barcelonën si dhe Ishujt Kanarie, ku është planifikuar një takim me migrantë që kanë rrezikuar jetën e tyre duke kaluar rrugën e rrezikshme nga Afrika Perëndimore drejt Evropës.
