Presidenti i Francës, Emmanuel Macron, po shqyrton gjithnjë e më shumë mundësinë e njohjes së shtetit palestinez, por disa diplomatë dhe ekspertë paralajmërojnë se një hap i tillë mund të jetë i parakohshëm dhe joefikas si mjet presioni ndaj Izraelit për të avancuar drejt një marrëveshjeje paqeje me palestinezët.
Sipas ekspertëve, kjo lëvizje e Macronit mund të thellojë ndarjet brenda Perëndimit, jo vetëm në kuadër të Bashkimit Evropian që është tashmë i përçarë, por edhe të rrezikojë marrëdhëniet me Shtetet e Bashkuara të Amerikës – aleatin më të ngushtë të Izraelit. Ata thonë se nëse njohja do të jetë më shumë se një gjest simbolik, ajo duhet të shoqërohet me masa konkrete si sanksione apo ndalime tregtare.
Zyrtarët francezë po e shqyrtojnë këtë çështje në prag të një konference të Kombeve të Bashkuara, e cila do të organizohet nga Franca dhe Arabia Saudite dhe që synon të përcaktojë parametrat për një “hartë rruge” drejt shtetësisë palestineze, duke garantuar njëkohësisht edhe sigurinë e Izraelit.
Nëse Macron vendos të ecë përpara, Franca – që është vendi me komunitetin më të madh hebre dhe mysliman në Evropë – do të bëhej “fuqia e parë e madhe perëndimore” që njeh shtetin palestinez, duke i dhënë vrull një nisme që deri tani është udhëhequr nga vende më të vogla me qëndrime kritike ndaj Izraelit.
“Po të njohë Franca shtetin palestinez, disa vende të tjera evropiane do ta ndjekin këtë shembull,” deklaroi për Reuters ministri i Jashtëm i Norvegjisë, Espen Barth Eide.
Qëndrimi i Macron ka ndryshuar në mes të ofensivës së intensifikuar izraelite në Gaza dhe përshkallëzimit të dhunës nga kolonët izraelitë në Bregun Perëndimor. Në Paris është rritur ndjenja e urgjencës për të vepruar para se mundësia për një zgjidhje me dy shtete të shuhet përfundimisht.
“Kemi nevojë të kalojmë nga fjalët në vepra. Përballë realitetit në terren, perspektiva për një shtet palestinez duhet të mbahet gjallë. Nevojiten masa të pakthyeshme dhe konkrete,” tha këshilltarja e Macron për Lindjen e Mesme, Anne-Claire Legendre, më 23 maj në një takim përgatitor në Nju Jork.
Diplomatët megjithatë paralajmërojnë se, edhe pse Macron tani mbështet këtë ide, ai ende nuk ka marrë një vendim përfundimtar dhe situata mund të ndryshojë – veçanërisht nëse arrihet një marrëveshje armëpushimi në Gaza.
Megjithatë, diplomatët francezë po përpiqen të krijojnë kushtet më të mira për një vendim të tillë, përfshirë vlerësimet e plota në konferencën e OKB-së mbi reformimin e autoritetit palestinez, çarmatosjen e Hamasit apo rindërtimin e ardhshëm të Gazës.
Zyrtarët izraelitë kanë bërë muaj me radhë lobim për të parandaluar atë që disa e quajnë një “bombë bërthamore” për marrëdhëniet dypalëshe. Ideja që Franca – një nga aleatët më të ngushtë të Izraelit dhe anëtare e G7-s – të njohë shtetin palestinez, me siguri do të shkaktonte zemërim tek kryeministri izraelit Benjamin Netanyahu.
