Kryeministri Albin Kurti tha se platforma “Made in Kosova” që e përuroi sot bashkë me zëvendëskryeministren Donika Gërvalla-Schwarz dhe ambasadorin e SHBA-së në Kosovë, Jeffrey Hovenier është “për Kosovën”.
Kurti shkroi në Facebook se platforma “përmban informata të detajuara mbi dhjetë sektorët kyç të vendit tonë”.
“Si një projekt në pronësi shtetërore, e rezultat i bashkëpunimit të ngushtë me USAID, platforma “MIK” përmban informata të detajuara mbi dhjetë sektorët kyç të vendit tonë, me shifra që jo vetëm iu shërbejnë investitorëve potencialë por që tregojnë transparencën me të cilën qeveriset shteti ynë. Ajo është dritare digjitale institucionale për shumë miq jashtë vendit, që janë të interesuar të mësojnë më shumë për realitetin e potencialin tonë ekonomik, kulturor e turistik”, shkroi Kurti.
“Kurse këndin fizik “Made in Kosova”, së shpejti do ta hapim e do ta gjejmë në secilin mision diplomatik. Aty, do ta pasqyrojmë dhe promovojmë Republikën tonë përmes prodhuesve, artistëve e sipërmarrësve tanë, që do të jenë ambasadorët më të rinj të popullit, shtetit dhe vendit tonë”, shtoi ai.
Kurti e ka falënderuar Ministrinë e Punëve të Jashtme dhe USAID-in “për vizionin dhe punën deri në finalizimin e këtij projekti jashtëzakonisht të rëndësishëm”.
