Selia e Komisionit Evropian u detyrua të premten të fikë sistemin e klimatizimit për shkak të valës së të nxehtit, gjë që shkaktoi kritika serioze nga punonjësit, pasi klimatizimi nuk u fik në katet ku qëndrojnë zyrtarët e lartë.
Punonjësit që punojnë në ndërtesën Berlaymont morën në mesditë një mesazh me tekst me këtë përmbajtje: “Berl – urgjente – Për shkak të kushteve ekstreme të motit, sistemi i ftohjes do të fiket detyrimisht nga kati i parë deri në katin e shtatë deri në fund të ditës”.
Në ndërtesën 13-katëshe ndodhen zyrat e presidentes Ursula von der Leyen, 26 komisionerëve evropianë dhe rreth 3.000 punonjësve. Von der Leyen punon në katin e 13-të, ndërsa zyrat e shumicës së komisionerëve ndodhen në katin e tetë ose më lart. Belgjika dhe një pjesë e madhe e Evropës prej një jave po përballen me temperatura jashtëzakonisht të larta, me thyerje rekordesh të temperaturave.
Komisioni Evropian më herët gjatë kësaj jave lëshoi udhëzime për punonjësit e tij, të cilat përfshijnë shmangien e qëndrimit jashtë në pjesën më të nxehtë të ditës, pirjen e rregullt të ujit dhe nisjen më herët të orarit të punës.
Megjithatë, këto rekomandime shkaktuan pakënaqësi te një pjesë e punonjësve të Komisionit që punojnë në ndërtesa pa klimatizim, përfshirë edhe Drejtorinë e Përgjithshme për Bujqësi (DG AGRI), siç tregojnë komunikimet e brendshme në të cilat ka pasur qasje Politico Brussels Playbook.
“Është si feudalizëm”, tha për Politico një zyrtar i Komisionit Evropian që punon në katet e ulëta të ndërtesës Berlaymont dhe që dëshiroi të mbetet anonim për të folur lirshëm, duke aluduar në faktin se katet e sipërme, ku punojnë komisionerët, e mbajtën klimatizimin të ndezur. Një zyrtar tjetër u pajtua se bëhet fjalë për një “turp”.
Një punonjës i tretë, i cili punon në katin e tetë, tha të premten për Politico se temperatura në zyra, pavarësisht klimatizimit funksional, vazhdonte të ishte 25.7 gradë Celsius.
Vala e të nxehtit ka rihapur debatin për mungesën e sistemeve të klimatizimit në shtëpi dhe zyra në të gjithë Evropën. Vetëm rreth një e pesta e familjeve në kontinentin evropian kanë pajisje klimatizimi. Në Belgjikë, një e pesta e të gjithë trenave nuk kanë klimatizim, për çka kompania kombëtare hekurudhore u detyrua të anulonte një numër të madh nisjesh gjatë orëve më të ngarkuara.
Edhe Parlamenti Evropian këtë javë u përball me ndërprerje të energjisë elektrike për shkak të rritjes së konsumit, të shkaktuar nga përdorimi i shtuar i sistemeve të ftohjes.
