Transportuesit paralajmërojnë se Bosnjë dhe Hercegovina mund të përballet me një situatë ku importi dhe eksporti i mallrave do të rrezikohen seriozisht, ndërsa zinxhirët e furnizimit do të vihen në pikëpyetje.
Qindra kamionë bllokuan pikën kufitare Svilaj në Bosnjë dhe Hercegovinë, duke krijuar kolona kilometrike, pasi transportuesit protestuan kundër rregullave të BE-së që kufizojnë qëndrimin e tyre në zonën Shengen në 90 ditë.
Qarkullimi i udhëtarëve vazhdon pa pengesa, ndërsa kamionët janë parkuar përgjatë rrugës.
Bllokimi i pikave kufitare është ndaluar në entitetin Republika Srpska, në Kantonin e Hercegovinës Perëndimore dhe në Kantonin Una-Sana, por në Kantonin Posavina nuk janë marrë masa të tilla.
Transportuesit paralajmërojnë se situata mund të përkeqësohet nëse nuk nisin urgjentisht bisedime të drejtpërdrejta me institucionet e Bashkimit Evropian dhe vendet fqinje.
Borjana Krišto më herët kishte propozuar nisjen e një iniciative të përbashkët nga vendet e Ballkanit Perëndimor drejt BE-së për zgjidhjen e koordinuar të problemeve në sektorin e transportit rrugor ndërkombëtar.
Transportuesit theksojnë se prej kohësh po përballen me probleme në kufijtë me BE-në për shkak të zbatimit të rregullit që lejon qëndrimin vetëm 90 ditë brenda një periudhe prej 180 ditësh. Në fund të janarit, përfaqësuesit e transportuesve nga Ballkani Perëndimor protestuan në kufijtë e BE-së, por kjo nuk çoi në ndryshimin e rregullave evropiane.
Ata kërkojnë:
- Heqjen e akcizës për karburantin nga autoritetet vendore
- Rimbursimin e TVSH-së për transportin ndërkombëtar
- Zbatimin e masave të dakorduara për të përshpejtuar procedurat dhe për të ulur pritjet në kufi
Transportuesit theksojnë se janë detyruar të ndërmarrin këtë bllokadë për shkak të rregullave, sipas tyre diskriminuese, që kufizojnë qëndrimin e tyre në BE, edhe pse posedojnë të gjitha lejet dhe licencat e nevojshme dhe qëndrojnë vetëm në tranzit.
