Shtatë persona janë plagosur, prej tyre tre rëndë, kur dy burra me motor hodhën granata dore në një qendër argëtimi në rrugën Park Caddesi në Stamboll, rreth orës 1:40 pas mesnate.
Motociklistët hodhën një granatë dore në katin e dytë të një ndërtese pesëkatëshe. Pas njoftimit, në vendin e ngjarjes janë dërguar shërbimet emergjente, ekspertë për eksplozivë, ekipe për ekzaminimin e vendit të ngjarjes, forca speciale, njësi për luftën kundër terrorizmit dhe zjarrfikësit.
Vendngjarja është kontrolluar edhe nga qentë e policisë. Po shqyrtohen pamjet nga kamerat e sigurisë përreth për të identifikuar autorët e sulmit.
Të plagosurit janë dërguar në spitalet më të afërta. Motivi dhe detajet e sulmit ende nuk janë të njohura.
