Izraeli do të pranojë kërkesën e administratës së presidentit amerikan Donald Trump për të ndalur sulmet ndaj Iranit, por do të vazhdojë operacionet ushtarake në jug të Libanit, raportoi CNN duke cituar dy burime izraelite.
Një nga burimet e përshkroi situatën si “shumë të brishtë”, duke theksuar se ende ekziston rreziku që Irani të rifillojë sulmet ndaj Izraelit nëse forcat izraelite vazhdojnë veprimet e tyre në Liban.
Irani kishte njoftuar më herët të hënën pezullimin e operacionit të tij ushtarak kundër Izraelit, por paralajmëroi se mund ta rifillojë atë nëse Izraeli vazhdon sulmet në Liban. Kjo ka shtuar më tej pasigurinë lidhur me mundësinë e zgjerimit të konfliktit në rajon.
Sipas CNN-it, vendimi i Izraelit ka të bëjë vetëm me ndalimin e sulmeve ndaj Iranit me kërkesë të administratës amerikane, ndërsa operacionet në jug të Libanit do të vazhdojnë.
Deri më tani nuk janë bërë publike detaje shtesë lidhur me kohëzgjatjen e këtij vendimi apo hapat e mundshëm diplomatikë që mund të pasojnë.
Pas përshkallëzimit të konfliktit dhe shkëmbimit të sulmeve raketore ndërmjet Tel Avivit dhe Teheranit, reagoi urgjentisht presidenti amerikan Donald Trump.
Përballë një situate që rrezikon të shndërrohet në një luftë të gjerë rajonale, Trump dërgoi një mesazh të shkurtër, por të qartë për të dyja palët.
“Izraeli dhe Irani duhet të ndalojnë menjëherë të shtënat”, deklaroi Trump, në një përpjekje të re për të ndalur gjakderdhjen, pasi kryeministri izraelit Benjamin Netanyahu kishte injoruar një ditë më parë këshillën e tij për të shtyrë sulmin hakmarrës.
