“Trupat ruse kishin përdorur kloropikrinën, një gaz të lëngshëm helmues që mund të ketë pasoja vdekjeprurëse, veçanërisht në zona të mbyllura”, thuhet në deklaratë
Agjencitë e inteligjencës gjermane dhe holandeze kanë pohuar se “Rusia ka rritur përdorimin e armëve kimike në Ukrainë”, transmeton Anadolu.
Inteligjenca e Jashtme Gjermane (BND), shërbimi i inteligjencës ushtarake holandeze MIVD dhe shërbimi i inteligjencës holandeze AIVD lëshuan një deklaratë të përbashkët.
Në deklaratë thuhet se “Rusia ka rritur përdorimin e armëve kimike në Ukrainë”.
Thuhet se trupat ruse kishin përdorur kloropikrinën, një gaz të lëngshëm helmues që mund të ketë pasoja vdekjeprurëse, veçanërisht në zona të mbyllura si praktikë standarde dhe të përhapur dhe se Rusia po shkelte kështu Konventën për Armët Kimike.
Drejtori i MIVD-së, zëvendësadmirali Peter Reesink ka thënë se përdorimi në rritje i armëve kimike nga Rusia në Ukrainë është alarmues. “Kërcënimi nga programi i armëve kimike të Rusisë po rritet”, tha ai.
Ministri holandez i Mbrojtjes, Ruben Brekelmans tha se Rusia kishte rritur përdorimin e armëve kimike “sistematikisht” dhe “në shkallë të gjerë”. “Kjo është një situatë e rrezikshme. Është plotësisht e papranueshme dhe tregon edhe një herë brutalitetin e agresorit me të cilin po përballet Ukraina”, tha ai.
Brekelmans shtoi se përdorimi i armëve kimike nga Rusia nuk duhet të normalizohet. “Kjo kërkon sanksione të mëtejshme, izolimin e Rusisë dhe vazhdimin e pandërprerë të mbështetjes ushtarake për Ukrainën”, potencoi ai.
Ministria ukrainase e Mbrojtjes tha se Rusia përdori agjentë kimikë kundër trupave ukrainase më shumë se 9 mijë herë. Në këtë kontekst, Ukraina midis shkurtit 2023 dhe qershorit 2025 i raportoi Organizatës për Ndalimin e Armëve Kimike (OPCW) në qershor se kishte dokumentuar më shumë se 9.700 raste të trupave ruse që përdornin municione që përmbanin substanca kimike të rrezikshme si armë lufte.
