Ushtarët izraelitë kanë shitur sende të plaçkitura nga Gaza dhe Libani, zbulon një hetim i ri. Raporti nga Hamakom Hachi Ham Bagehenom (“Vendi më i nxehtë në ferr”) ka mbledhur një numër të madh dëshmish për vjedhjet që dyshohet se janë kryer nga pjesëtarët e ushtrisë izraelite.
Ndër sendet e vjedhura përfshiheshin shuma të mëdha parash, bizhuteri, pajisje elektronike dhe madje edhe automjete. Këto objekte më pas janë shitur në kanale të Telegramit, në Facebook Marketplace ose në ankande publike.
Komandanti i brigadës Nahal, i cili përdori pseudonimin Eitan për të mbetur anonim, shpjegoi se në fillim ushtarët i merrnin këto sende si suvenire, por grabitjet shpejt u përshkallëzuan.
Kontrolli i çantave të ushtarëve nuk ishte më prioritet, pasi “i gjithë batalioni po e bënte këtë. Ushtarët e kryenin plaçkitjen kudo dhe i fshihnin sendet gjithandej”.
Problemi i vërtetë nisi kur nuk ishin më vetëm ushtarët e rinj ata që vidhnin, por edhe oficerët, të cilët u përfshinë në vjedhje.
“Një komandant i lartë mori pajisje nga shtëpitë e njerëzve në Gaza, me dijeninë e plotë të oficerëve të batalionit. Shkova te komandanti im dhe e pyeta çfarë po ndodhte. Ai tha se kjo dukej shumë keq, por nuk mund të bënte asgjë”, tha Eitan.
Sipas hetimit, sendet e vjedhura që shiten zakonisht janë inkriminuese, gjë që i bën të papërshtatshme për përdorim normal. Ato përfshijnë bizhuteri me mbishkrime në arabisht, municione dhe armë, të cilat nëse përdoren, mund të shkaktojnë dyshime.
“Është shumë më e lehtë të marrësh para në dorë sesa të marrësh diçka dhe ta shesësh. Kam dëgjuar për raste kur janë marrë shuma të mëdha parash, mijëra e dhjetëra mijëra shekelë, sepse bankënotat janë gjëja më e lehtë për t’u vjedhur”, tha një tjetër ushtar, Omar, për këtë publikim.
“Nuk është e paarsyeshme të mendohet se disa sende janë marrë për t’u shitur, por gjithashtu e di që shumë njerëz e kuptojnë se kjo është tejkalim i kufijve të arsyes, ndaj përpiqen ta fshehin. Ata që shesin nuk janë të gatshëm të flasin për këtë me shokët e tyre menjëherë”, shtoi ai.
Omar tha gjithashtu se ata që janë në pozita më të larta nuk e shohin këtë si problem. Ai shpjegoi: “Në nivelet e larta kanë mbyllur sytë për këtë”, duke nënvizuar se nuk kanë interes të trajtojnë problemin e plaçkitjeve.
Ushtari beson se vjedhjet ndodhin edhe mes komandantëve, me sende që janë edhe më të vlefshme.
Sipas raportit, kur gjenden para ose municione, ushtarët duhet të raportojnë te eprorët e tyre, të cilët më pas duhet të njoftojnë Njësinë për Pastrimin e Plackave (Yahpash) të Departamentit të Teknologjisë dhe Logjistikës së ushtrisë.
Një muaj pas nisjes së luftës së Izraelit kundër Gazës, kjo njësi raportoi se kishte konfiskuar pesë milionë shekelë (1.3 milionë dollarë) nga enklava e rrethuar dhe i kishte depozituar ato në arkën shtetërore. Sot, kjo shifër ka arritur në 100 milionë shekelë (27.6 milionë dollarë) në para të gatshme nga Gaza dhe Libani së bashku.
Javën e kaluar, një raport i ri nga media izraelite Ynet përshkroi sasi të mëdha sendesh të çmuara të vjedhura nga ushtarët izraelitë në Siri, Liban dhe Gaza, përfshirë kuti me para të gatshme me vlerë afro 28 milionë dollarë, shufra ari, bizhuteri luksoze dhe 183,000 armë.
Plaçkitja ishte aq e përhapur saqë ushtarët bënin shaka duke thënë se kishin “thyer shtyllën kurrizore” duke mbajtur sendet e vjedhura.
Pjesën më të madhe të plaçkitjeve i kryenin njësi speciale ushtarake të përkushtuara për “kapjen” e parave dhe pasurisë nga territoret e “armikut”. Megjithatë, edhe ushtarët individualë kryenin plaçkitje në mënyrë të pavarur.
Gjatë pushtimeve të vazhdueshme në Siri, Liban dhe Gaza, ushtarët kanë konfiskuar aq shumë armë sa mund të formonin një ushtri të vogël, raporton Ynet.
