Një zyrtar i lartë i Hamasit ka konfirmuar se grupi militant është në bisedime të drejtpërdrejta me Shtetet e Bashkuara për paqen në Gaza, duke shtuar se beson se Donald Trump mund të ndihmojë në arritjen e një marrëveshjeje.
Duke folur për Sky News, Dr Basem Naim tha se Hamasi ka ndarë marrëveshjen e tij të propozuar si përmes ndërmjetësve ashtu edhe “drejtpërdrejt me disa persona në administratën amerikane”, përcjell Telegrafi.
Ata po bëjnë thirrje për “një shkëmbim të burgosurish, tërheqje totale të forcave izraelite, lejimin e të gjithë ndihmave për të hyrë në Gaza dhe rindërtimin e Rripit të Gazës pa imigrim të dhunshëm”, tha ai.
Dr Naim gjithashtu foli rreth asaj nëse Hamasi – i cili ka qenë në pushtet që kur fitoi zgjedhjet palestineze të vitit 2006 – mund të tërhiqej nga qeveria për të siguruar paqen.
“Ne gjithashtu u kemi thënë amerikanëve, ne jemi të gatshëm që, përsëri, të dorëzojmë qeverinë menjëherë nëse arrijmë në fund të kësaj lufte”, tha ai.
Dr Naim shtoi se Hamasi ka “pranuar” një propozim egjiptian të paqes i cili “po flet për formimin e një organi palestinez, të pavarur, politikisht të palidhur për të drejtuar Rripin e Gazës”.
“Para kësaj, për sa kohë që ne jemi ende njerëz të okupuar, ne kemi të gjithë të drejtën të vazhdojmë të mbrojmë popullin tonë dhe t’i rezistojmë okupimit me të gjitha mjetet, duke përfshirë edhe rezistencën”, theksoi ai.
Ndërsa duke e kthyer vëmendjen e tij drejtpërdrejt te presidenti amerikan, zyrtari i lartë i Hamasit tha se ai mendon se zoti Trump “ka aftësinë dhe vullnetin për të arritur këtë situatë paqësore”.
Ai tha: “Gaza dhe gazanët meritojnë, si të gjithë njerëzit e tjerë kudo, të jetojnë në paqe dhe dinjitet”.
“Dhe unë mendoj se presidenti Trump mund ta bëjë këtë nëse ushtron mjaftueshëm presion mbi izraelitët për t’i dhënë fund kësaj lufte menjëherë. Dhe ne jemi të gatshëm të bashkëpunojmë me të për të arritur këtë qëllim për një rajon më paqësor”
