Gjyqtarët e Gjykatës Penale Ndërkombëtare kanë kërkuar që Hungaria të shpjegojë pse nuk arriti të arrestojë kryeministrin izraelit Benjamin Netanyahu kur ai vizitoi Budapestin më herët këtë muaj.
Gjykata me seli në Hagë ka nisur një procedurë për mosrespektim të rregullave kundër Hungarisë, pasi Netanyahu u prit me ceremoni zyrtare, pavarësisht urdhrit për arrestim ndaj tij për akuza që lidhen me krime kundër njerëzimit gjatë luftës në Gazë.
Gjatë vizitës, kryeministri hungarez Viktor Orbán njoftoi se vendi i tij do të largohet nga gjykata, duke deklaruar në një radio lokale se GJPN “nuk është më një gjykatë e paanshme, por një gjykatë politike dhe jo juridike”.
Lideri hungarez, të cilin kritikët e cilësojnë si autokrat, mbrojti vendimin e tij për të mos e arrestuar Netanyahun.
“Ne kemi nënshkruar një marrëveshje ndërkombëtare, por kurrë nuk kemi ndërmarrë të gjitha hapat që do ta bënin atë të zbatueshme në Hungari,” tha Orbán, duke iu referuar faktit se parlamenti hungarez kurrë nuk e ka integruar në legjislacionin kombëtar statutin e gjykatës.
Disa ditë para mbërritjes së Netanyahut, kryetari i organit mbikëqyrës të gjykatës i kishte shkruar qeverisë hungareze duke e kujtuar për detyrimin konkret për të përmbushur kërkesat e gjykatës për arrestim dhe dorëzim.
Hungaria ka afat deri më 23 maj për të paraqitur prova në mbrojtje të saj.
