Shefi i Mbrojtjes së Gjermanisë, gjenerali Carsten Breuer, ka lëshuar një direktivë me të cilën urdhëron që ushtria gjermane të jetë plotësisht e pajisur me armatim të nevojshëm deri në vitin 2029.
Sipas agjencisë Reuters, ai vlerëson se deri atëherë, Rusia mund të ketë rindërtuar kapacitetet e saj ushtarake në një masë që do të paraqiste kërcënim serioz për territorin e NATO-s.
Në dokumentin e nënshkruar nga Breuer më 19 maj thuhet se Gjermania do ta arrijë këtë qëllim me ndihmën e fondeve shtesë të planifikuara pas lehtësimit të rregullit të borxhit në muajin mars.
Përmbajtja e direktivës pasqyron prioritetet e sigurisë së Gjermanisë për vitet e ardhshme, në përputhje të madhe me pritjet e NATO-s.
Breuer thekson veçanërisht nevojën për forcimin e mbrojtjes kundërajrore, me fokus në aftësinë për të kapur dronët.
Ndër prioritetet kryesore përmendet gjithashtu zhvillimi i kapaciteteve për të kryer sulme precize në thellësi, në distanca mbi 500 kilometra.
Një nga objektivat strategjike është edhe zgjerimi i shpejtë i aftësive të Gjermanisë në luftën elektronike dhe krijimi i një sistemi të qëndrueshëm për operacione ofensive dhe mbrojtëse në hapësirë.
