Kryeministri kroat Andrej Plenković deklaroi se, me iniciativën e tij, janë ndryshuar pjesë të konkluzioneve për zgjerimin e Bashkimit Evropian me Malin e Zi, duke i dërguar këtij vendi një mesazh për të zgjidhur çështjet e hapura. Ai mohoi se Kroacia ka qenë nën presion nga disa shtete anëtare për këtë çështje.
“Me iniciativën tonë i ndryshuam konkluzionet, duke u dërguar kolegëve në Mal të Zi një mesazh realist që të angazhohen në bisedime me Kroacinë dhe të zgjidhim ato pak çështje të hapura, të cilat ne konsiderojmë se janë plotësisht të zgjidhshme nga ana e Malit të Zi”, tha Plenković.
Plenković: Nuk ka pasur asnjë presion
Pas ndërhyrjes së Plenkovićit, konkluzionet për Malin e Zi u ndryshuan në krahasim me draftin e mëparshëm, nga i cili u hoqën afatet kohore.
“Këshilli Evropian mbështet punën që po zhvillohet për hartimin e traktatit të anëtarësimit me Malin e Zi. Ai merr parasysh synimin e presidencës irlandeze për të punuar në mbylljen e përkohshme të kapitujve negociues, me kusht që Mali i Zi të zbatojë reformat përkatëse”, thuhet në konkluzione.
Në krahasim me draftin e mëparshëm, është hequr pjesa që parashikonte arritjen e marrëveshjes për mbylljen e përkohshme të kapitujve deri në fund të këtij viti, si dhe pjesa që kërkonte përgatitjen e traktatit të anëtarësimit sa më shpejt që të ishte e mundur.
I pyetur nëse liderë të tjerë evropianë, si kancelari gjerman Friedrich Merz, kishin ushtruar presion ndaj tij për çështjen e Malit të Zi, Plenković tha se këto informacione nuk janë të sakta.
“Nuk ka pasur asnjë presion. Përkundrazi, shumë vende kanë mirëkuptim për këtë dhe, në fund të fundit, Kroacia ka treguar se çfarë do të thotë të jesh konstruktiv”, tha Plenković.
Euronews: Gjermania po ushtron presion ndaj Kroacisë për Malin e Zi
Euronews raportoi, duke iu referuar burimeve diplomatike anonime, se Gjermania ka shtuar presionin ndaj Kroacisë që të zgjidhë çështjet e hapura me Malin e Zi, në mënyrë që të mos ketë ngecje në procesin e anëtarësimit të këtij vendi në Bashkimin Evropian.
Plenković tha se kancelari gjerman Friedrich Merz nuk kishte folur fare për këtë temë, duke shtuar se raportimet mediatike mund të kenë qenë reflektim i disa bisedimeve të zhvilluara në margjinat e një takimi në nivel sekretarësh shtetërorë dy ose tre ditë më parë.
“Merz dhe unë kemi marrëdhënie shumë të mira. Në mbledhjet e Këshillit Evropian ulemi pranë njëri-tjetrit prej vitesh”, tha Plenković.
Ai shtoi se Kroacia ka mbajtur një qasje shumë konstruktive ndaj Malit të Zi, ndryshe nga ajo që vetë Kroacia kishte përjetuar gjatë negociatave të saj të anëtarësimit, kur për shkak të disa bllokadave humbi tre deri në katër vjet në proces.
“Ne nuk kemi ndjekur një qasje të tillë ndaj Malit të Zi. Kemi mbajtur një qasje konstruktive, kemi mbështetur negociatat e anëtarësimit të Malit të Zi që nga viti 2012, kemi ndarë përkthimet e gjithë acquis communautaire jo vetëm me Malin e Zi, por edhe me vendet e tjera të rajonit, kemi ndihmuar në të gjitha aspektet dhe, në fund, kemi dhënë pëlqimin për mbylljen e 21 kapitujve”, tha Plenković.
