Të paktën tre persona kanë humbur jetën, përfshirë dy fëmijë të moshës tre dhe katër vjeç, gjatë përpjekjes për të kaluar Detin Mesdhe nga Libia në Itali, njoftoi një organizatë bamirëse gjermane për shpëtimin në det.
Migrantët u zbuluan dje në një gomone që lundronte në jug të ishullit italian Lampedusa dhe u vërejt nga një avion vëzhgimi i agjencisë kufitare të BE-së, Frontex.
“Kur arritëm te gomonia rreth orës 16:30, ishte tepër vonë për të ndihmuar disa persona”, deklaroi organizata, duke shtuar se 59 persona u mbijetuan dhe u shpëtuan.
Në njoftim thuhet se fëmijët, trupat e të cilëve u gjetën në gomone, “kishin vdekur një ditë më parë, ndoshta nga etja”.
Një burrë u gjet pa ndjenja dhe u shpall i vdekur pasi përpjekjet për ta reanimuar dështuan, ndërsa të mbijetuarit thanë se edhe një migrant tjetër ishte mbytur pasi ra në ujë.
Shumë nga të mbijetuarit, të cilët u transferuan në Lampedusa, kishin djegie nga përzierja e ujit të kripur dhe karburantit.
Dy fëmijë dhe katër të rritur në gjendje kritike iu dorëzuan rojes bregdetare italiane për t’u transportuar më shpejt në breg.
Gomonia kishte lundruar nga porti i Zawiyas në Libinë perëndimore të mërkurën, më 7 maj, por motori i saj kishte dështuar pas një dite udhëtimi, duke i lënë migrantët të ekspozuar në det ndaj erërave dhe kushteve të motit.
Lampedusa ndodhet mes Tunizisë, Maltës dhe ishullit më të madh italian, Siçilisë, dhe është porta e parë për shumë migrantë që përpiqen të arrijnë në BE nga Afrika e Veriut.
Sipas të dhënave të Organizatës Ndërkombëtare për Migracionin, që nga viti 2014 kanë humbur jetën ose janë zhdukur pothuajse 25.000 migrantë në këtë rrugë qendrore të Mesdheut, përfshirë rreth 1.700 vitin e kaluar dhe 378 këtë vit.
