Dronët ukrainas gjatë natës së së shtunës shkaktuan zjarre në edhe dy objekte nafte ruse, ndërsa autoritetet në Kiev presin sulme të reja të fuqishme ruse ndaj kryeqytetit.
Zyrtarët rusë njoftuan se në rajonin e Rostovit, në portin e Taganrogut, pas rënies së mbetjeve të një droni shpërtheu një zjarr që dëmtoi një depo nafte dhe një cisternë nafte. Një incident i ngjashëm u raportua edhe në rajonin fqinj të Krasnodarit, ku një depo nafte në Armavir u përfshi nga flakët.
Presidenti ukrainas Volodymyr Zelensky konfirmoi sulmin ndaj Armavirit dhe tha se bëhet fjalë për një objekt të industrisë ruse të naftës. Në rrjetin X ai shkroi se është goditur edhe një objekt tjetër i industrisë ruse të naftës – Armaviri. Ai shtoi se ky qytet ndodhet “500 kilometra larg kufirit tonë shtetëror” dhe përfundoi: “Me të drejtë po e kthejmë luftën atje nga ku erdhi.”
Ndërkohë, Ukraina ka zgjeruar kapacitetet e saj për sulme me rreze të mesme dhe të gjatë veprimi, duke u mbështetur në teknologjinë vendore të dronëve dhe raketave.
Sulmet ndaj objekteve ruse të naftës, të cilat luajnë një rol të rëndësishëm në financimin e pushtimit, janë bërë pothuajse të përditshme.
Nga ana tjetër, Rusia po godet rrjetin energjetik dhe qytetet ukrainase me raketa balistike me rreze të gjatë veprimi. Kievi po përgatitet për bombardime të tjera pasi Ministria e Jashtme e Rusisë njoftoi më herët këtë javë për “sulme sistematike” ndaj kryeqytetit ukrainas. Zelensky deklaroi të enjten se po ushtron presion shumë të madh ndaj Shteteve të Bashkuara të Amerikës për t’i furnizuar Ukrainës më shumë sisteme Patriot për mbrojtje nga raketat balistike.
Sulmet e reja erdhën një ditë pasi një dron rus, i cili mori pjesë në një sulm ndaj Ukrainës, devijoi nga trajektorja dhe goditi një ndërtesë banimi në lindje të Rumanisë, vend anëtar i NATO-s, duke plagosur dy persona. Ky incident ka shtuar më tej frikën për përhapjen e konfliktit përtej kufijve të Aleancës dhe ka shkaktuar reagime të ashpra në mbarë Evropën.
