Presidenti i Shteteve të Bashkuara të Amerikës, Donald Trump, u takua me presidentin e Turqisë, Recep Tayyip Erdoğan, me rastin e Samitit të NATO-s, i cili këtë vit po mbahet në Ankara.
Pas takimit, Erdoğan dhe Trump iu drejtuan mediave, ndërsa presidenti amerikan pati vetëm fjalë lavdëruese për liderin turk.
Ai tha se marrëdhëniet mes Amerikës dhe Turqisë janë ndoshta më të mirat deri më tani, si dhe paralajmëroi se administrata e tij do t’i heqë sanksionet e vendosura ndaj Ankarasë në bazë të ligjit CAATSA, të cilat u vendosën pasi Turqia bleu sistemet S-400 nga Rusia.
“Nuk duam të vendosim sanksione ndaj miqve”, tha Trump.
Duke folur për marrëdhëniet bilaterale, presidenti amerikan theksoi se Turqia është një aleate e madhe e Washingtonit dhe nënvizoi se gjatë konflikteve të fundit rajonale nuk është rreshtuar në anën e kundërt.
“Turqia mund të hynte në konflikt në anën tjetër. Ata janë shumë të fuqishëm, por nuk e bënë këtë. Ndoshta nuk e bënë për shkakun tim”, tha Trump.
Ai shtoi se marrëdhëniet me Ankaranë sot janë më të mira se kurrë dhe veçanërisht e lavdëroi Erdoğanin.
“Që nga dita e parë kur jemi njohur, kemi pasur marrëdhënie të shkëlqyera. Ndonjëherë më së miri merresh vesh me njerëzit më të fortë, si ai, ndërsa nuk merresh vesh me më të dobëtit”, tha Trump, duke shtuar se ata të dy janë miq të mëdhenj dhe se Erdoğan ka bërë një punë të jashtëzakonshme.
Trump theksoi edhe fuqinë ushtarake të Turqisë, duke vlerësuar se shumë njerëz nuk e kuptojnë se sa e fuqishme është ajo në të vërtetë.
“Turqia, nën udhëheqjen e presidentit Erdoğan, është bërë një fuqi shumë e madhe ushtarake. Njerëzit nuk e dinë sa të fortë janë realisht. Ata kanë ushtarë të shkëlqyer”, tha ai.
Duke folur për programin e avionëve luftarakë F-35, Trump konfirmoi se administrata e tij do ta shqyrtojë mundësinë e shitjes së këtyre avionëve Turqisë, pavarësisht kufizimeve të deritanishme ligjore.
“Do të marrim një vendim. Shumë njerëz ndoshta do të thoshin: pse të mos e bëjmë këtë? Sot kemi një marrëdhënie shumë më të mirë me Turqinë, ndërsa Turqia në shumë aspekte ka qenë më besnike se disa vende të tjera për të cilat mendonim se do të ishin besnike. Sigurisht që do ta shqyrtojmë këtë”, tha presidenti amerikan.
Ai shtoi se me Erdoğanin do të bisedojë edhe për tregtinë, bashkëpunimin ushtarak dhe çështje të tjera bilaterale.
Trump foli edhe për blerjen e mëhershme të avionëve amerikanë, duke thënë se SHBA-ja ka detyrim të ndihmojë në mirëmbajtjen e motorëve të këtyre avionëve.
“Kur blini një avion nga SHBA-ja, mendoj se ne kemi detyrim t’i mirëmbajmë motorët dhe të ndihmojmë në mirëmbajtjen e tyre”, tha ai.
I pyetur nga gazetarët nëse e shqetëson posedimi i sistemit rus të mbrojtjes ajrore S-400 në Turqi, Trump u përgjigj shkurt se nuk e shqetëson asgjë.
Presidenti i Turqisë, Erdoğan, deklaroi se vendi i tij më herët kishte marrë premtim për dorëzimin e pesë avionëve F-35 dhe shprehu besimin se Trump do ta mbajë premtimin.
“Presidenti Trump gjithmonë qëndron pas fjalës së tij. Besoj se do të merret një vendim pozitiv lidhur me programin F-35”, tha Erdoğan.
Trump foli edhe për NATO-n, duke theksuar se më herët ishte i zhgënjyer nga Aleanca dhe se ndoshta nuk do të merrte pjesë fare në samit po të mos mbahej në Turqi.
“Isha shumë i zhgënjyer nga NATO-ja. Sinqerisht, sikur samiti të mos mbahej në Turqi, ku është miku im, një lider shumë i fortë, është e mundur që as të mos kisha ardhur”, tha Trump.
