Dështimi

Albinot Maloku

Me 3 gusht u caktua nga Presidenti i Republikës Hashim Thaçi, dita kur do të duhej të mbahej mbledhja e parë themeluese për legjislaturën e gjashtë dhe Qeverinë e Re të Kosovës. Nga tri pika të rendit të ditës të kësaj mbledhjeje, vetëm dy patën sukses, e pika e tretë, ku parashihej zgjedhja e kreut të Kuvendit, dështoi. Kjo pikë edhe pas gjashtë mbledhjeve themeluese të legjislaturës së gjashtë të Republikës së Kosovës, nuk u jetësua. Kandidati është, por mungojnë numrat. Ekziston e drejta, por jo edhe mundësia. Shpjegim qesharak për vendin i cili prej kohësh gjendet para situatave dështuese! Apo jo?

Pa dallim orientimi politik, të gjithë po thonë se vendit ia duan të mirën, edhe se janë në kërkim të gjetjes së modaliteteve të cilat do të ofronin një qeveri që i bije vendit tamam. Me numra e brenda Kuvendit, palët nuk po arrijnë të bëjnë asnjë ndryshim. Pas dështimit të mbledhjes provuese, të gjashtës me radhë të kuvendit për të themeluar institucionet e reja, akterët e skenës politike ia kanë mësy zyrave e restoranteve për të gjetur modalitete. Askush nuk del me qenë dallimi kur është në pyetje qëndrimi për të dalë nga kjo situatë krize politike, institucionale, shtetërore, ekonomike, diplomatike e të tjera. Marrëdhënia e palëve vazhdon të zhvillohet mbi kushtëzime. Parimet! Çka janë ato? Nuk janë pa këndej pari prej kohësh. Kushtëzimi nuk është parim.

Dështim për Republikën e Kosovës nuk është vetëm pafuqia për formimin e institucioneve të reja pas një procesi të parakohshëm zgjedhor (gati tre muaj prej kur ato u mbajtën), por pasoja e pasojat që po nxjerr ky dështim mund të jenë katërçipërisht të mëdha. Klasa politike në vend prej kohësh konsiderohet fajtore për gjendjen e qytetarit, përbuzëse e nënçmuese për shtetin. Kjo klasë politike që edhe institucionin e Kuvendit e ka shndërruar në arenë cirku nuk do t’ia di për vendin, për atë se çfarë po ndodh e si po funksionon arsimi, shëndetësia, bujqësia, kultura, sporti, diplomacia, ekonomia. Për atë se në cilën derexhe është duke jetuar qytetari e fshatari i Kosovës.

Kur sheh veprimet e klasës politike, përgjegjëse për obligimet që i ka dhënë vetës, nuk mund të akuzosh asnjërin prej kujdestarëve armiq të Republikës së Kosovës. Për gati tre muaj pas zgjedhjeve, edhe fituesit edhe humbësit e 11 qershorit ende kujtojnë se janë në fushata të pista ku gjoja lejohet të thuhet e flitet çka t’i vije gojës. Përgjegjësia! Çka është kjo? Edhe kjo nuk është parë moti këndej pari. Kalkulimet zgjedhore nuk janë përgjegjësi.

Përvoja me kriza e ngërçe institucionale nuk është se nuk kemi. Ato ishin dhe prodhuan vetëm shëmti. Me siguri se studentët e lëndës Sistemi politik i Republikës së Kosovës, të gjeneratave të ardhshme do të mësojnë edhe për zgjedhjen e shefit të shtetit me zarf. Nënçmim më të madh për qytetarin e një shteti demokratik e të lirë nuk ka. Shteti i Kosovës e ka përjetuar këtë. Klasa politike e pa mbushur mend, potencialisht me veprimet e tyre, do të mund të sjellin situatën ku do të kemi edhe shef të qeverisë së vendit të zgjedhur prej zarfi. Nënçmim! Po, këtë e dimë se çka është. Ka kohë që sillet këndej pari. Mos të vlerësosh zgjedhjen e qytetarit është nënçmim.

Si pasojë e krizave e ngërçeve politike e institucionale të krijuara nga klasa politike e vendit, Kosova me 2014-tën përjetojë edhe ikjen më të madhe të popullatës pas asaj të dhunës serbe të 1999-tës. Edhe sot, si pasojë e dështimit të kësaj klase për të ofruar zgjidhje e perspektiva për qytetarët e vendit, potencialisht mund të provojë edhe një ikje tjetër masive.

Janë këto dy situata të lartpërmendura që mes vete ndajnë ngjashmëri dhe që të dyja vinë si shkak e pasojë e shëmtuar për vendin. Rekomandime për të dal nga këto kriza e ngërçe politike, nuk është se nuk ka pasur por ato nuk janë marr në konsideratë. Sistemi zgjedhor e politik i vendit pa dyshim se nuk është ai më i miri e që e ndjek demokracinë së bashku me rregullat e obligimet e veta. Ky sistem zgjedhor e politik, jo vetëm tani por edhe në të ardhmen ka për të pas nevojë për koalicione mes subjektesh politike të llojeve e përmbajtjeve të ndryshme ideore e programore. Konform kësaj, me synim të mos pasjes së dështimeve për shtetin edhe të kundërtit do të mund të ishin koalicion më i mirë sesa intervenimi ndërkombëtar për të rregulluar situatat në Kosovë.

Kategoritë
ANALIZA JAVORE

Të ngjajshmet

  • Komunat

    Albinot Maloku Edhe një herë qytetaret e Kosovës do ta kenë rastin t’i dëgjojnë e t’i shohin politikanët e vendit, duke dhënë premtime nëpër fjalimet e tyre të shumta,...
  • Demokracia

    Albinot Maloku Pesëmbëdhjetë shtatori, që nga 2007-ta, shënohet si Dita Ndërkombëtare e Demokracisë, e përcaktuar sipas rezolutës së Asamblesë së Përgjithshme të Kombeve të Bashkuara. Kjo gjë u bë...
  • Zëvendëskryeministrat

    Albinot Maloku Pas afro tre muajsh që nga mbajtja e zgjedhjeve të parakohshme parlamentare, deputetët e partive dhe partiçkave, e zgjodhën Kadri Veselin kryetar të legjislaturës së gjashtë të...
  • Bajrami

    Albinot Maloku Marrëveshje mes subjekteve politike për krijimin e institucioneve të reja të vendit ende nuk ka. Edhe pas tentimit të gjashtë të mbledhjes themeltar të Kuvendit të Kosovës...