Më shumë se 6,000 policë britanikë po përgatiten për trazira të reja anti-imigrante dhe anti-islamike për shkak të njoftimit të ekstremistëve të djathtë që do të sulmojnë qendrat për kërkuesit e azilit dhe zyrat e imigracionit në të gjithë vendin.
Situata në rrugët e Britanisë së Madhe është e tensionuar që kur një 17-vjeçar vrau me thikë tre vajza në qytetin veriperëndimor të Anglisë, Southport, javën e kaluar.
Grupet anti-imigrante dhe anti-islamike kanë përdorur atë krim për të përhapur dezinformata dhe urrejtje në internet, duke shkaktuar trazira në disa qytete. Ata kanë shpikur informacionin se autori ishte një islamist dhe kërkues azili, megjithëse policia më vonë njoftoi se asgjë nga kjo nuk ishte e vërtetë.
Grupet anti-raciste dhe anti-fashiste kanë njoftuar kundër-demonstrata në qytetet e tërë vendit.
“Plehërat raciste do të përpiqen të sulmojnë zyrën e një avokati imigracioni. Nuk do të lejojmë që kjo të ndodhë – merrni maskat e fytyrës”, tha një prej kundër-demonstrantëve.
Qeveria ka krijuar një njësi prej gjashtë mijë specialistësh për të luftuar kundër trazirave, të cilët do të përgjigjen ndaj çdo dhune.
“Kjo vend përballet me një nga shpërthimet më të këqija të trazirave të dhunshme në dekadën e fundit. Nuk do ta tolerojmë këtë në rrugët tona. Do të përdorim të gjitha forcat, taktikat dhe mjetet e disponueshme për të parandaluar trazira të reja”, tha Andy Valentine, përgjegjës për operacionin policor në Londër.
Kryeministri britanik, Keir Starmer, njoftoi se deri tani janë arrestuar më shumë se 400 persona, dhe 100 prej tyre janë akuzuar, ndërsa priten së shpejti dënimet e para.
Në aplikacionet e komunikimit, trazirëbërësit po planifikojnë sulmet të mërkurën ndaj qendrave të imigracionit dhe firmave ligjore që ndihmojnë migrantët. “Të mërkurën në mbrëmje, djem. Ata nuk do të ndalojnë së ardhuri derisa t’u thuash të ndalojnë”, thuhet në një mesazh.
