Projektligji për të ndryshuar Aktin e Terrorizmit të vitit 2000, që ndalon 3 grupe, përfshirë “Palestine Action” (Veprimi për Palestinën), miratohet në Dhomën e Komunëve
Deputetët britanikë votuan dje në favor të ndalimit të grupit aktivist pro-palestinez “Palestine Action” (Veprimi për Palestinën) si një organizatë terroriste, transmeton Anadolu.
Projektligji për të ndryshuar Aktin e Terrorizmit 2000 dhe për të ndaluar tre organizata, përfshirë “Palestine Action”, i cili u prezantua zyrtarisht nga Sekretarja e Brendshme, Yvette Cooper në fillim të kësaj jave, u miratua në Dhomën e Komunëve me 385 vota pro dhe 26 kundër.
Urdhri gjithashtu ndalon dy grupe neonaziste “Maniacs Murder Cult” (MMC) dhe “Ruse Imperial Movement” (RIM). Të martën, qeveria britanike njoftoi se “Palestine Action”, “Maniacs Murder Cult” dhe “Ruse Imperial Movement” do të ndalohen “pas këshillave nga ekspertë ndërqeveritarë”.
Gjatë votimit të së mërkurës, ministri i Shtetit për Sigurinë, Dan Jarvis tha: “Duke zbatuar këtë masë, ne do të heqim velin e legjitimitetit të ‘Palestine Action’, do të trajtojmë mbështetjen e tij financiare dhe do të degradojmë përpjekjet e tij për të rekrutuar dhe radikalizuar njerëzit që të kryejnë aktivitete terroriste në emër të tij”.
Qëllimi për të ndaluar “Palestine Action” erdhi pasi aktivistët e grupit hynë me forcë në bazën “Brize Norton” të Forcave Ajrore Mbretërore në Oxfordshire dhe dëmtuan dy avionë më 20 qershor për të protestuar kundër mbështetjes së Mbretërisë së Bashkuar për Izraelin dhe sulmet e tij në Rripin e Gazës.
Shumë politikanë dhe organizata të të drejtave të njeriut kanë shprehur shqetësim që kur qeveria njoftoi planin e saj për të ndaluar grupin. Kohët e fundit, një grup prej më shumë se 400 figurash i kërkuan qeverisë britanike të tërhiqej nga qëllimi i saj për të ndaluar “Palestine Action” dhe të “ndalonte armatosjen e Izraelit”.
Ekspertët e të drejtave të njeriut të OKB-së të martën i bënë thirrje qeverisë britanike të braktisë planin e saj për të klasifikuar “Palestine Action” si një organizatë terroriste sipas Aktit të Terrorizmit të vitit 2000, duke paralajmëruar se një veprim i tillë do të shkelte standardet ndërkombëtare dhe do të shtypte mospajtimin legjitim.
