Me mavijosje dhe gjurmë gjaku në fytyrë, disa nga rusët e arrestuar nën dyshimin për kontrabandë droge dhe mashtrim kibernetik u paraqitën këtë javë para gjykatës në kryeqytetin azerbajxhanas, Baku.
Pamjet e transmetuara nga mediat ruse shkaktuan indinjatë, ashtu si ato paraardhëse ku të arrestuarit detyroheshin të uleshin me duart në kokë, apo pamjet e bastisjes së redaksisë azerbajxhanase të agjencisë ruse Sputnik.
Me këtë, Baku duket se dërgon një mesazh të qartë drejt Moskës, e cila vetë akuzon policinë ruse për tortura dhe vdekjen e dy azerbajxhanasve etnikë gjatë një aksioni më parë. Ndërkohë, autoritetet ruse kanë arrestuar disa azerbajxhanas të tjerë.
“Pamje të dhjetë të rinjve rusë tmerrësisht të rrahur, arrestuar një ditë më parë. Atëherë ata ishin ende në gjendje të mjaftueshme, megjithëse disa kishin gjak nga hunda. Tani fytyrat e tyre ishin mbushur me hematoma të mëdha, e disa madje kishin kokën si një top të purpurt,” shkruan me indinjatë gazeta ruse Komsomolskaja Pravda (KP), përshkruante gjendjen e të arrestuarve rusë.
Mediet azerbajxhanase raportuan se për tetë prej të arrestuarve është caktuar masa e paraburgimit për katër muaj. Ndërsa mediat azerbajxhanase flasin për një “bandë kriminale”, mediat ruse i përshkruajnë si ekspertë IT apo turistë.
“Vështirë të jenë kriminelë,” komenton KP, duke spekuluar se ndoshta janë arrestuar për t’u përdorur më pas si “të mbajtur peng”.
Ky nuk është rasti i parë i arrestimit të shtetasve rusë në Azerbajxhan. Policia lokale më parë bastisi zyrën e Sputnik-ut—e ndaluar që nga shkurti—dhe arrestoi shtatë persona, përfshirë dy të dyshuar si agjentë FSB-je.
Zëdhënësja e Ministrisë ruse të Jashtme, Marija Zaharova, deklaroi të mërkurën për Sputnik se zyrtarëve rusë ende nuk u lejohet të bisedojnë me “gazetarët e arrestuar”.
“Për popujt tanë miqësia është tepër e rëndësishme. Ata që duan ta dëmtojnë, duhet të mendojnë mirë për veprimet e tyre,” tha Zaharova, duke lënë detyrimisht pa u përmbyllur mesazhin.
Megjithatë, tensionet duket se nuk po ulen. Prokuroria e Bakut hapi të martën hetim për vdekjen e vëllezërve Husejn dhe Zijadin Safarov, të cilët vdiqën gjatë një bastisjeje policore në Jekaterinburg. Autoritetet ruse pretendojnë se vdekja ishte pasojë e “dobësisë së papritur” apo sulmit në zemër, por ekspertët forenzikë azerbajxhanas e hedhin poshtë plotësisht këtë version.
Kryelideri i diasporës nxirret me forcë nga Mercedes-i
Në Jekaterinburg, gjykata konfirmoi të mërkurën paraburgim për gjashtë azerbajxhanas etnikë të arrestuar gjatë një aksioni masiv. Sipas mediave ruse, edhe anëtarë të tjerë të komunitetit azerbajxhanas ishin në shënjestër.
“Të njëjtën ditë në Voronezh, shërbimet e sigurisë trokitën në derën e Jusif Halilovit, bashkëpronarit të tregut më të madh ‘Aleksejevski’ dhe me origjinë azerbajxhanase,” shkruan KP, duke shtuar se Halilov u lirua më pas.
Gjithçka u regjistrua nga kamerat. Konflikti mes Rusisë dhe Azerbajxhanit po përshkallëzohet: bastisje brutale në mes të ditës, forcat speciale ndërhyjnë kundër një biznesmeni të fuqishëm.
KP raporton gjithashtu se presidenti azerbajxhanas Ilham Aliyev mori një telefonatë përkrahjeje nga presidenti ukrainas Volodymyr Zelenski, që u interpretua si paralajmërim:
“Ishte një ‘pikë e zezë’ – të gjithë e dinë çfarë bën deputetëve që afrohen me Zelenskin. Karriera e tyre shpesh del nga shinat…”
