Amnesty International: Franca nuk është “kampione e fjalës së lirë”

“Retorika e qeverisë franceze mbi fjalën e lirë nuk mjafton për të fshehur hipokrizinë e saj të paturpshme”, tha Marco Pirolini nga Amnesty International.

Amnesty International akuzoi sot qeverinë franceze se nuk ishte “kampione e fjalës së lirë, gjë që i pëlqen të mendojë se është”, duke kritikuar retorikën e fundit qeveritare si “hipokrizi të turpshme”, transmeton Anadolu Agency (AA).

“Retorika e qeverisë franceze mbi fjalën e lirë nuk mjafton për të fshehur hipokrizinë e saj të paturpshme”, tha Marco Pirolini, një studiues në grupin e të drejtave të njeriut, duke shtuar se liria e shprehjes “nuk do të thotë asgjë nëse nuk vlen për të gjithë”.

Ai akuzoi presidentin francez Emmanuel Macron dhe qeverinë e tij për “dyfishimin e fushatës së njollosjes” kundër muslimanëve francezë rreth vrasjes së Samuel Paty, mësuesit të frëngjishtes i cili u vra brutalisht në mes të tetorit.

“Ata filluan sulmin e tyre ndaj lirisë së shprehjes”, tha Pirolini, duke përmendur incidentet e fundit si marrja në pyetje për orë të tëra nga policia franceze e katër fëmijëve 10-vjeçarë nën dyshimin e “apologjisë së terrorizmit”.

Ai gjithashtu iu referua vendimit të gjykatës për dy burra për “përbuzje” pasi ata dogjën një figurë që përshkruante Macron-in gjatë një proteste paqësore, si dhe një projekt-ligj që diskutohej në parlament që do të kriminalizonte përdorimin e imazheve të zyrtarëve të zbatimit të ligjit në mediat sociale.

“Është e vështirë ta sqarosh këtë me mbrojtjen e fuqishme të autoriteteve franceze të së drejtës për të përshkruar Profetin Muhamed në karikatura”, theksoi Pirolini.

Ai theksoi se liria e shprehjes së muslimanëve dhe zbatimit të fesë së tyre zakonisht merrte vëmendje të pakët në Francë nën maskën e universalizmit republikan, duke nënvizuar se në emër të sekularizmit, muslimanëve në Francë iu ndalua të veshnin simbole fetare ose të visheshin në shkolla dhe punë të sektorit publik.

“Rekordi i Francës mbi lirinë e shprehjes në zona të tjera është po aq i zymtë. Mijëra njerëz dënohen çdo vit për ‘përbuzje ndaj zyrtarëve publikë’, një vepër penale e përcaktuar në mënyrë të paqartë që autoritetet e zbatimit të ligjit dhe gjyqësorët kanë aplikuar në një numër masiv për të heshtur mospajtimin paqësor”, shtoi Pirolini.

“Në qershor të këtij viti, Gjykata Evropiane e të Drejtave të Njeriut zbuloi se dënimet e 11 aktivistëve në Francë për fushatën për bojkot të produkteve izraelite shkelnin fjalën e tyre të lirë”, tha ai.

Pirolini kritikoi lëvizjet e fundit nga autoritetet për të ndaluar organizatat dhe mbyllur xhamitë në bazë të “konceptit të paqartë të radikalizimit”. Ai gjithashtu akuzoi qeverinë për ndërthurjen e “radikalizimit” me veprimet e muslimanëve të devotshëm.

“Fushata e qeverisë për fjalën e lirë nuk duhet të përdoret për të mbuluar masat që i vënë njerëzit në rrezik të abuzimeve të të drejtave të njeriut duke përfshirë torturat”, tha ai.

Muajin e kaluar, Macron e përshkroi Islamin si “një fe në krizë” dhe njoftoi planet për ligje më të ashpra për të trajtuar “separatizmin islamik” në Francë.

Tensionet u përshkallëzuan më tej pasi mësuesi i shkollës së mesme Paty u vra dhe iu pre koka më 16 tetor në periferi të Parisit në shenjë hakmarrjeje pasi shfaqi para studentëve të tij karikatura blasfemuese të Profetit Muhamed gjatë një ore për lirinë e shprehjes.

Karikaturat fyese nga javorja franceze Charlie Hebdo u paraqitën gjithashtu në ndërtesat në disa qytete franceze.

Macron mbrojti karikaturat, duke thënë se Franca “nuk do të hiqte dorë nga karikaturat tona”, duke shkaktuar zemërim në të gjithë botën muslimane.

Kategoritë
BotaLajme

Të ngjajshmet