Mediat izraelite raportuan se një zyrtar i lartë i Autoritetit Kombëtar Kibernetik të Izraelit është arrestuar në Las Vegas nën dyshimin për pedofili online.
Sipas faqes së lajmeve Ynet, Tom Alexandrovich, 38 vjeç, u arrestua nga Policia Metropolitane e Las Vegasit gjatë një konference ku mori pjesë javën e kaluar në emër të autoritetit kibernetik.
Ai u arrestua së bashku me shtatë të dyshuar të tjerë në kuadër të një “operacioni shumë-agjencor të fokusuar në grabitqarët seksualë të fëmijëve, i cili çoi në arrestimin e tetë personave gjatë dy javëve të fundit”, njoftoi policia e Las Vegasit.
Sipas policisë lokale, të dyshuarit “përballen me akuza për krimin e joshjes së një fëmije përmes kompjuterit me qëllim akti seksual”.
Autoriteti Kombëtar i Kibernetikës, i cili mbikëqyret nga Zyra e Kryeministrit, reagoi:
“Punonjësi njoftoi Autoritetin se gjatë udhëtimit në SHBA ishte marrë në pyetje nga autoritetet amerikane për çështje që nuk kishin të bënin me punën dhe se ishte kthyer në Izrael në datën e planifikuar. Autoriteti ende nuk ka marrë detaje shtesë përmes kanaleve zyrtare. Nëse merr një kërkesë, do të veprojë sipas saj. Në këtë fazë, me një vendim të përbashkët, punonjësi ka marrë leje nga puna derisa të sqarohet çështja”.
Megjithatë, Ynet raportoi se, ndryshe nga deklarata e autoritetit, dokumentet e policisë së Las Vegasit tregojnë se Alexandrovich – shefi i departamentit të mbrojtjes teknologjike të Autoritetit për Sigurinë Kibernetike – është arrestuar në SHBA.
Sipas raportit, zyrtari i lartë izraelit është liruar me garanci prej 10.000 dollarësh pasi doli para gjykatësit.
“Dokumentet tregojnë se Alexandrovich dyshohet për joshjen e një fëmije me probleme mendore duke përdorur teknologjinë kompjuterike për marrëdhënie seksuale”, shkroi Ynet.
Si përgjigje, Autoriteti Kombëtar për Sigurinë Kibernetike shtoi se “nuk ka qenë i përfshirë në asnjë çështje që lidhej me garancinë”.
Policia izraelite refuzoi të komentonte situatën e Alexandrovich pas kthimit në vend, duke thënë:
“Si rregull, çdo ankesë ose informacion që ngre dyshime për kryerjen e një vepre penale hetohet nga policia dhe, aty ku ka bazë të arsyeshme për dyshim, hapet hetim sipas rastit dhe rrethanave. Ne nuk japim detaje mbi ekzistencën ose jo të hetimeve, dhe kjo as nuk konfirmon, as nuk mohon ekzistencën e tyre.”
Rasti vjen pasi një tjetër zyrtar i lartë izraelit është akuzuar për sjellje të papërshtatshme.
Ambasadori i Izraelit në Emiratet e Bashkuara Arabe (EBA), Yossi Shelley, u tërhoq muajin e kaluar pasi zyrtarë të lartë të Emirateve u ankuan për sjellje të papërshtatshme.
Shelley, i cili para se të bëhej ambasador në EBA ishte drejtor i përgjithshëm i Zyrës së Kryeministrit, konsiderohet i afërt me kryeministrin Benjamin Netanyahu.
Një zyrtar i lartë i Ministrisë së Jashtme izraelite tha të shtunën për Kanalin 12 se “tema për të cilën ai flet gjithmonë në mënyrë të tepruar janë prostitutat”, duke shtuar: “Kjo është ajo për të cilën i flet të gjithëve, kjo është tema për të cilën pëlqen të flasë më së shumti”.
Sipas raportit, gjatë qëndrimit në EBA, Shelley frekuentonte “vende të dyshimta”. Kur zyrtarët emiratas tentuan të kontrollonin këto vizita, “Shelley shpërtheu dhe sulmoi rojat duke bërtitur: ‘Nuk do të më mbyllni’”.
