Policia gjermane është përplasur ashpër me demonstruesit pro-palestinezë në Berlin, të cilët protestuan kundër sulmeve izraelite mbi Gazën dhe vrasjeve të gazetarëve. Gati 200 protestues u mblodhën të enjten në sheshin Hackescher Markt për të dënuar bombardimet izraelite në Gaza, shënjestrimin e gazetarëve dhe urinë që ende prek këtë territor të rrethuar.
Pesë gazetarë dhe një zjarrfikës ishin mes të paktën 20 palestinezëve të vrarë nga sulmet izraelite të hënën në kompleksin mjekësor Nasser në Khan Younis të Gazës. Duke brohoritur slogane në mbështetje të Palestinës, protestuesit kërkuan ndërprerjen e sulmeve izraelite mbi Gazën. “Izraeli terrorist” dhe “Liri për Gazën” ishin disa nga parullat që turma e mbledhur brohoriste gjatë protestës.
Policia ndërhyri gjatë demonstratave dhe një polic goditi një protestues me grusht në fytyrë. Tetë pjesëmarrës të protestës u arrestuan.
Javën e kaluar, sistemi për monitorimin e urisë dhe kequshqyerjes i mbështetur nga OKB – Integrated Food Security Phase Classification (IPC) – konfirmoi se në Rripin e Gazës po mbizotëron uria. Izraeli që nga tetori i vitit 2023 ka vrarë pothuajse 63.000 palestinezë në Gaza. Fushata e tij ushtarake e ka shkatërruar këtë enklavë.
Në nëntor të vitit të kaluar, Gjykata Penale Ndërkombëtare lëshoi urdhërarreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli po përballet gjithashtu me një padi për gjenocid në Gjykatën Ndërkombëtare të Drejtësisë për shkak të luftës së tij në Gaza.
