Presidenti ukrainas Volodymyr Zelensky ka akuzuar shërbimin ushtarako-informativ të Hungarisë për zhvillimin e operacioneve të spiunazhit në pjesën perëndimore të Ukrainës.
Sipas Zelenskyt, Budapesti është përpjekur të ndërhyjë në çështjet e brendshme të Ukrainës në disa mënyra. Ai përmendi se para fillimit të luftës, shërbimet dhe agjencitë ukrainase kishin ndaluar shpërndarjen ilegale të pasaportave hungareze në rajonin perëndimor të Zakarpattia.
“Megjithatë, në maj të vitit 2025, SBU publikoi arrestimin e spiunëve hungarezë në Zakarpattia. Pse e bëmë publik këtë rast? Sepse kemi fotografi dhe video shtesë të takimeve të organizuara nga Shërbimi Kombëtar i Sigurisë Ushtarake Hungareze (KNBSZ) në territorin hungarez – dhe nëse do të jetë e nevojshme, do t’i publikojmë. Nuk dua të kërcënoj askënd, por i kemi të gjitha,” deklaroi Zelensky.
Sipas tij, Ukraina ka njohuri të detajuara për mënyrën se si KNBSZ i ka paguar spiunët dhe operativët e vet për detyra specifike në territorin ukrainas.
“Rrjeti informativ hungarez po zhvillohet që nga viti 2021, ndërsa çështjet që lidhen me ushtrinë janë bërë aktive që nga viti i kaluar. Transferimi dhe shkëmbimi më i fundit i informacioneve ndodhi më 25 mars të këtij viti,” shtoi ai.
Zelensky gjithashtu paralajmëroi se Hungaria ka mbledhur informacione për sistemet ukrainase të mbrojtjes ajrore, duke kërkuar në mënyrë specifike të dhëna për vendndodhjen e sistemeve S-300 në rajonet perëndimore.
“Pse Hungarezët kërkuan të dinin se ku kemi vendosur sistemin raketor S-300 në atë zonë? I interesonte. Ata madje kishin një listë pyetjesh në telefonat e tyre – dhe ne e kemi atë listë. Ka njëmbëdhjetë pyetje, përfshirë atë se çfarë mendimi kanë banorët e Zakarpattias për praninë e forcave paqeruajtëse hungareze dhe ku janë të stacionuara njësitë tona ushtarake. Si duhet të përgjigjemi ne ndaj kësaj gjatë kohës së luftës?”, tha Zelensky.
Ai shtoi se i ka pyetur zyrtarët e NATO-s nëse ata i kanë kërkuar Hungarisë të mbledhë të dhëna të tilla, por ata i kishin thënë “jo”.
“Unë jam president i një vendi në luftë – si do të reagonit ju po të ishit në vendin tim?”, pyeti ai.
Më 9 maj, Shërbimi i Sigurisë së Ukrainës (SBU) njoftoi se kishte zbuluar agjentë të shërbimit ushtarak të inteligjencës së Hungarisë që vepronin në rajonin e Zakarpattias. Në një operacion të posaçëm, SBU arrestoi dy agjentë që vepronin nën drejtimin e një oficeri të inteligjencës hungareze.
Si kundërpërgjigje, Hungaria dëboi dy diplomatë ukrainas, duke i akuzuar për spiunazh.
