Sipas The Telegraph, Ukraina mund të pranojë ndërprerjen e luftimeve dhe të lërë nën kontrollin rus territoret që Moska mban tashmë, si pjesë e një plani paqeje të mbështetur nga Evropa.
Volodimir Zelenski u ka thënë liderëve evropianë se duhet të hedhin poshtë çdo propozim të Donald Trump-it që kërkon që Ukraina të heqë dorë nga territore të tjera, por se Rusisë mund t’i lejohet të mbajë një pjesë të vendit që ka pushtuar tashmë.
Kjo do të nënkuptonte “ngrirjen” e vijës së frontit aty ku është dhe dorëzimin de facto të kontrollit rus mbi zonat e okupuara në Luhansk, Donjeck, Zaporizhia, Herson dhe Krime.
Zbutja e pozicionit negociues vjen në prag të bisedimeve të parashikuara midis Trump-it dhe Putinit në Alaskë të premten.
“Plani mund të lidhet vetëm me qëndrimet aktuale të ushtrisë,” tha një zyrtar perëndimor, duke përshkruar një fundjavë të ethshme diplomacie mes Kievit dhe aleatëve të tij.
Ukraina dhe Evropa janë gjithnjë e më të shqetësuara se Trump dhe Putin mund të negociojnë për përfundimin e luftës pa përfshirjen e plotë të Zelenskit.
“Kami shumë frikëra dhe shumë shpresa,” tha të hënën kryeministri polak Donald Tusk. Ai shtoi se zyrtarët amerikanë kanë premtuar konsultime me liderët evropianë përpara bisedimeve personale mes Trump-it dhe Putinit.
Shqetësimi kryesor në Evropë është një plan i supozuar paqeje, i mbështetur nga Moska, që parashikon ngrirjen e frontit në juglindje të Ukrainës nëse Kievi pranon të tërhiqet nga zonat e Donjeckut dhe Luhanskut që kontrollon.
Diplomatët evropianë thonë se nuk ka ndryshim të rëndësishëm në objektivat e përgjithshme të luftës së Putinit, të cilat synojnë rrëzimin e qeverisë pro-perëndimore të Ukrainës dhe zëvendësimin e saj me një regjim të afërt me Moskën.
Sipas Institutit për Studimin e Luftës (ISW) me qendër në Uashington, Rusia vazhdon të synojë “kapitullimin e plotë” të Kievit, duke përfshirë bllokimin e çdo perspektive anëtarësimi në NATO dhe demilitarizimin.
Të hënën në mbrëmje, presidenti Zelenski tha se nuk ka shenja që Rusia po përgatitet t’i japë fund luftës, pavarësisht bisedimeve të ardhshme për paqe. “Përkundrazi, ata po lëvizin trupat dhe forcat në mënyrë që të nisin operacione të reja ofensive,” tha ai, duke iu referuar raporteve të inteligjencës ukrainase.
