Gazeta amerikane Wall Street Journal raporton se pas luftës, gjatë së cilës raketat iraniane goditën shumë baza amerikane në Lindjen e Mesme, ushtria amerikane po shqyrton zhvendosjen e disa bazave, madje ndoshta edhe në Izrael.
“Kur raketat dhe dronët iranianë u nisën drejt qendrës kryesore të operacioneve detare amerikane në Lindjen e Mesme, një pjesë e tyre goditën objektivat”, shkruan WSJ.
Baza detare amerikane në Bahrein ishte disa herë objektiv sulmesh nga fundi i shkurtit deri në qershor. Sulmet që arritën të depërtonin mbrojtjen shkaktuan dëme të mëdha, tregon një analizë e pamjeve satelitore, videove nga rrjetet sociale dhe bisedave me ish-ushtarakë dhe ushtarakë aktualë, e kryer nga The Wall Street Journal — dëme të cilat Pentagoni nuk i ka pranuar publikisht. Janë dëmtuar rëndë selia komanduese, të paktën edhe dhjetëra ndërtesa të tjera, si dhe dy terminale për komunikime satelitore.
Ushtria amerikane ka njoftuar se në bazën e njohur si Naval Support Activity Bahrain nuk ka pasur të vdekur dhe se sulmet nuk kanë ndikuar ndjeshëm në operacione. Shtetet e Bashkuara evakuuan shumicën e personelit, por mbajtën një numër më të vogël ushtarakësh në terren.
Gjatë luftës, “CENTCOM me të drejtë i dha përparësi mbrojtjes së njerëzve para mbrojtjes së objekteve, dhe strategjia jonë për mbrojtjen e personelit u tregua e suksesshme. Irani lëshoi më shumë se 8.000 raketa dhe dronë, ndërsa vetëm dy goditje çuan në vdekjen e shtetasve amerikanë”, tha kapiteni Tim Hawkins, zëdhënës i Komandës Qendrore të SHBA-së (CENTCOM), e cila mbikëqyr forcat amerikane në Lindjen e Mesme.
Hawkins gjithashtu tha se ushtria amerikane i ka shkaktuar Iranit dëme shumë më të mëdha sesa ato që ka pësuar vetë, duke theksuar se SHBA-ja ka goditur më shumë se 13.500 objektiva.
Dëmi i madh i shkaktuar në bazën e vetme detare amerikane në Lindjen e Mesme, së bashku me sulmet ndaj të paktën 20 lokacioneve amerikane në të gjithë rajonin, përfshirë objektet ushtarake dhe përfaqësitë diplomatike, e ka shtyrë SHBA-në të rishqyrtojë gjithë praninë e saj ushtarake në rajon, sipas zyrtarëve amerikanë të njohur me këto diskutime.
Ndër objektet e dëmtuara janë magazinat, një rezervuar uji, dy terminale për komunikime satelitore, qendra për menaxhimin e komunikimeve, si dhe ndërtesa e selisë së marinës amerikane për Lindjen e Mesme.
Sipas zyrtarëve të njohur me planet, ushtria amerikane tani po shqyrton rindërtimin e bazës në Bahrein, uljen e pranisë ushtarake në Kuvajt dhe Arabinë Saudite, si dhe zhvendosjen e disa bazave ose funksioneve të tyre më në perëndim, jashtë rrezes së raketave dhe dronëve iranianë.
Objektet që janë goditur mund të mos rindërtohen. Qendrat e komandimit dhe kontrollit mund të zhvendosen nën tokë. Po ashtu, kapacitetet ushtarake mund të shpërndahen në më shumë lokacione në të gjithë rajonin, megjithëse zyrtarët paralajmërojnë se vendimet përfundimtare ende nuk janë marrë.
Sipas dy zyrtarëve, ndër lokacionet që po shqyrtohen për vendosjen e forcave amerikane është edhe Izraeli. Ky vend gjatë luftës priti dhjetëra avionë amerikanë, përfshirë avionë luftarakë dhe avionë për furnizim me karburant në ajër.
Qeveria amerikane në prill ushtroi presion ndaj kompanive komerciale që ofrojnë pamje satelitore, që të kufizojnë qasjen në fotografitë që tregojnë shkatërrimet në bazat amerikane, si dhe në zonën më të gjerë të konfliktit, duke e vështirësuar kështu kuptimin e plotë të shkallës së dëmeve. Zyrtarët thanë se qëllimi i kësaj mase ishte mbrojtja e forcave amerikane.
