Presidenti i Serbisë, Aleksandar Vuçiç, e ka cilësuar si “shumë të rrezikshme” deklaratën e kryetares së Komisionit Qendror të Zgjedhjeve të Bosnje dhe Hercegovinës, Irena Hadžiabdiç, lidhur me zgjedhjet në Republikën Srpska që pritet të mbahen më 23 nëntor.
Konkretisht, Hadžiabdiç ka thënë se do të hapen 48 vendvotime në Federatën e BiH për votimin në mungesë.
“Edhe nëse askush nuk del në votime në RS, votuesit në Federatën e BiH do të mund të vendosin për këto zgjedhje”, theksoi ajo.
Vuçiç, duke folur mbrëmë për televizionin Pink, e krahasoi këtë situatë me Kosovën.
“Kjo është një deklaratë shumë e rrezikshme dhe ata po thonë se po ndërmarrin të njëjtin skenar si në veri të Kosovës dhe Metohisë. Disa njerëz po luajnë shumë, pa kuptuar që nuk është momenti të përdorin forcën e huaj për të realizuar interesat e tyre politike”, tha Vuçiç.
Kujtojmë se KQZ e Bosnjës dhe Hercegovinës ka miratuar buxhetin e nevojshëm për mbajtjen e zgjedhjeve të parakohshme në Republikën Srpska, në vlerë prej 6,4 milionë KM.
Vendimi për buxhetin është miratuar njëzëri, ndërsa më pas do të dërgohet kërkesa buxhetore në Ministrinë e Financave të BiH, në mënyrë që ky fond të transferohet në llogarinë e KQZ-së.
